Almatylyq «Qairat» klýby shabýylshy Dastan Satpaevtyń komanda sapyndaǵy sońǵy oiyndaryn ótkizetinin resmi túrde málimdedi, dep habarlaidy ult.kz.
Klýb málimetinshe, Dastan osydan on jyl buryn «Qairat» akademiiasyna úlken armanmen kelip, ýaqyt óte kele negizgi quramnyń kóshbasshylarynyń birine ainaldy. Ol klýb tarihyndaǵy rekord ieleriniń qatarynan oryn alyp, qazirgi quramnyń eń nátijeli oiynshysy atandy ári jankúierlerdiń zor yqylasyna bólendi.
Endi fýtbolshy «Qairattaǵy» jolyn aiaqtap, mansabyn Eýropada jalǵastyrýǵa daiyndalyp jatyr. Klýb jankúierlerdi onyń sońǵy matchtaryna kelip, óz túlegin laiyqty túrde shyǵaryp salýǵa shaqyrdy.
13 maýsym kúni «Qairat» óz alańynda «Atyraýdy» qabyldaidy, al 17 maýsymda «Qyzyljarmen» kezdesedi. Bul oiyndar Dastan Satpaev úshin londondyq «Chelsi» klýbyna aýysar aldyndaǵy «Qairat» jeidesindegi sońǵy matchtar bolmaq.
Sondai-aq «Qyzyljarǵa» qarsy kezdesýden keiin Ortalyq stadionda fýtbolshyǵa arnalǵan arnaiy qoshtasý rásimi ótedi.
