QR Jasandy intellekt jáne tsifrlyq damý ministrligi eGov júiesi buzylyp, Qazaqstannyń 15 million azamatynyń derekteri tarady degen aqparattyń shyndyqqa sáikes kelmeitinin málimdedi, dep habarlaidy ult.kz.
Ministrlik ýákiletti organdarmen birlesip tehnikalyq tekserý júrgizgen. Nátijesinde eGov aqparattyq júieleriniń buzylǵany anyqtalmaǵan.
Sonymen qatar mamandar darknet-te satylymǵa shyǵarylǵan faildarǵa taldaý jasaǵan. Olardyń málimetinshe, bul faildar ártúrli belgisiz qujattar men sýretterdiń jiyntyǵy bolyp shyqqan jáne eGov júiesinen alynǵan derekter bazasynyń kóshirmesi emes.
Ministrlik buǵan birneshe faktiniń dálel bolatynyn atap ótti. Máselen, darknet-te jariialanǵan derekter massiviniń kólemi men mazmuny bir-birine sáikes kelmeidi.
Sondai-aq eGov júielerinde habarlandyrýda aitylǵandai, azamattardyń pasporttarynyń skan-kóshirmeleri saqtalatyn baza joq. Tsifrlyq qujattar basqa tásilmen qalyptastyrylyp, saqtalady.
Osyǵan bailanysty ministrlik eGov júiesi buzylmaǵanyn jáne 15 million qazaqstandyqtyń derekteri júieden alynbaǵanyn resmi túrde málimdedi.
Vedomstvo buqaralyq aqparat quraldary men aqparattyq resýrstardy mundai málimetterdi taratpas buryn muqiiat tekserýge shaqyrdy. Ministrlik atap ótkendei, darknet-tegi anonimdi habarlandyrýdyń ózi aqparattyq júieniń buzylǵanyn nemese derekterdiń taraǵanyn dáleldemeidi.
