Túrki tildes elderdiń óneri men mádenietin dáripteitin TÚRKSOI-dyń kieli Túrkistan qalasynda keńsesi ashylýy múmkin. Uiymnyń uiytqy bolýymen Túrkistanda ótetin birqatar mańyzdy sharalardyń barysy Túrkistan oblysynyń ákimi Darhan Satybaldy men Túrki mádenietin jáne ónerin damytý halyqaralyq uiymynyń (TÚRKSOI) Bas hatshysy Sultan Raevpen kezdesýinde jan-jaqty talqylandy.
Taraptar kúlli túrki áleminiń rýhani astanasy – Túrkistandy jahanǵa pash etý jolyndaǵy tyń jobalardy talqylady. Túrki áleminiń yntymaqtastyǵyn arttyrýǵa arnalǵan mańyzdy jobalardyń iske asyrylǵany aityldy. Oblys basshysy halyqaralyq uiymnyń mańyzdy qyzmetin airyqsha atap ótti.
«Túrki memleketteriniń ózara bailanysyn arttyrda TÚRKSOI-dyń missiiasy zor. Túbi bir túrki halyqtarynyń mádenietin dáriptep, mádeni qundylyqtaryn saqtaý jolyndaǵy eńbekterińiz eren. Kúlli túrki áleminiń rýhani astanasy retinde biz de mádeniet pen óner salasyndaǵy máselelerge basa mán beremiz. Bul baǵyttaǵy bastamalar men tyń jobalarǵa qýana qoldaý bildiremiz. Ulttyq taǵylymy mol, jańa tanymdyq jobalarǵa jáne ádebiet pen ǵylymdy damytýǵa baǵyttalǵan bastamalarǵa airyqsha nazar aýdaramyz», – dedi Darhan Satybaldy.
Kezdesý barysynda 2021 jyly resmi túrde túrki áleminiń rýhani astanasy bolyp jariialanǵan Túrkistan qalasynyń áleýetin damytýǵa erekshe kóńil bólindi. Óz kezeginde, TÚRKSOI-dyń bas hatshysy túrki álemine ortaq sharalardyń birqataryn atap ótip, keler jyly Túrkistanda jastar arasynda ótetin etnofestival men halyqaralyq forýmnyń mańyzdylyǵyn atap ótti. TÚRKSOI jelisi boiynsha júzege asyrylýy múmkin is-sharalar men jobalar týraly habardar etti.
Kezdesýde Túrkistan mýzykalyq drama teatryndaǵy balet trýppasynyń sheberligi men múmkindigi nátijesinde el nazaryn aýdarǵan «Qorqyt týraly ańyz» atty plastikalyq spektakldiń túrki tildes elderine týrne jasaýy týraly másele kóterildi. Sondai-aq «Turkistan» telearnasyn túrkige ortaq aqparat alańyna ainaldyrý máselesi sóz boldy. Halyqaralyq telearnanyń aqparat almasý men media keńistik qalyptastyrýǵa baǵyttalǵan altyn kópir bolý jolynda túrkitildes elderde bólimshe ashý týraly da aityldy.
