Túrkistan oblysynda eldi mekenderdi infraqurylymmen qamtamasyz etý boiynsha ózekti máselelerdi sheshýge kúsh salynady. Turǵyndardy taza aýyz sý, jaryq, gazben qamtý, jol máseleleri – basty nazarda. Osy maqsatta búgin oblys ákimi Darhan Satybaldy salaǵa jaýapty basshylarymen kezdesti.
Basqosýda aýyz sýmen qamtamasyz etý úshin salynyp ne qaita qurylyp jatqan nysandar boiynsha kemshilikter ortaǵa salyndy. Qurylysy bitpegen ne sozylǵan jobalar talqylandy. Oblys basshysy bul saladaǵy problemalardy túbegeili sheshý boiynsha jaýapty sala basshylaryna naqty tapsyrmalar berdi.
«Turǵyndardy aýyz sýmen, gazben, infraqurylymmen qamtý – basty mindet. Oblysty infraqurylymmen qamtamasyz etý máselesi apta saiyn turaqty túrde qaralyp turatyn bolady. Túitkilder bolsa, birlesip sheshý jolyn tabaiyq. Aýyz sý máselesin tereń taldap, aýdan, qala ákimdikteri, basqarmalar nemese oblys ákimdigi deńgeiinde sheshiletinderin naqtylap bergen jón. Arnaiy jospar quryp, júieli jumys isteýimiz kerek», – dedi Darhan Satybaldy.
Túrkistan oblysynda 831 eldi mekenniń 712-si (7 qala, 705 aýyldyq eldi meken) nemese 85,7 % aýyz sýmen qamtamasyz etilgen. Josparǵa sáikes, oblystaǵy 119 eldi mekendi aýyz sýmen qamtamasyz etý josparlanýda. Qajetti qarjy kólemi – 21,7 mlrd. teńge.
Osy maqsatta biyl 21 nysanǵa (23 e.m.) 5,1 mlrd. teńge bólindi. On nysan jyl sońyna deiin paidalanýǵa beriledi. Qalǵany keler jylǵa ótpeli. Nátijesinde 23 eldi meken aýyz sýmen qamtylyp, oblysta aýyz sýmen qamtamasyz etý kórsetkishi 87 %-ǵa jetedi.
Jiynda ońtústik aýdandardy (Qazyǵurt, Saryaǵash, Keles, Jetisai, Maqtaaral) sapaly aýyz sýmen qamtý máselesi kóterildi. Ony sheshý úshin «Túrkistan oblysyndaǵy Ógem ózenindegi sý elektr stantsiialarynyń kaskady men sý qubyry» jobasyn investitsiia tartý arqyly iske asyrý josparlanýda.
Kentaýda jer asty sýlaryn tómendetý júiesin salý jobasynyń birinshi kezeńi aiaqtalýǵa taiady. Biregei jobanyń barysy Túrkistan oblysynyń ákimi Darhan Satybaldyǵa baiandaldy. Kendi shaharda salynyp jatqan jer asty sýlaryn tómendetý júiesi tolyq júzege asqan soń Kentaýdaǵy apattyń aldyn alý máselesi sheshilip, jinalǵan sý tiimdi paidalanylmaq. Tartylǵan sý «Qosqorǵan» sý qoimasyna quiylady. Túrkistan óńirine qosymsha 70 mln. m3 deiingi aǵyn sý jetkiziletin bolady.
Joba aiasynda burynǵy shahtaǵa túsetin ǵimarattyń ishine 60 m tereńdikte 11 sýsorǵysh ornatyp, «Kenshiler» saiabaǵynda ornalasqan betondy aryqqa quiý arqyly qala ishimen alyp ótý qarastyrylǵan. Nátijesinde Kentaýda jasandy kól paida bolady. Joba boiynsha 1,5 myń shaqyrym jol qazylyp, 5,5 shaqyrymǵa qubyr júrgizildi.
