Jekemenshik mektep salýdan Túrkistan oblysyndaǵy Sairam aýdany kósh bastap tur. Aqsýkent aýylynda búgin 1200 oryndyq jańa mektep ashyldy. Bul – bir ǵana Sairam aýdanynda jeke kásipkerler tarapynan 7 aida salynǵan 7-shi mektep. Budan bólek, Mankent aýylynda 600 oryndyq jańa mekteptiń qurylysy júrip jatyr. Bul týraly sairamdyqtarmen kezdesken Túrkistan oblysynyń ákimi Darhan Satybaldy málim etti.
Aiqyndaǵan mindetter men josparlardy baiandaǵan oblys basshysy «Memleket basshysy júktegen jaýapkershilikterdi sezinip, barlyq bastamalardy laiyqty júzege asyrýǵa mindettimiz», dedi. Turǵyndar kótergen usynystardyń oryndalý barysyn baiandady. Olar kezeń-kezeńimen sheshimin tabýda.
«Túrkistan oblysyndaǵy eń iri aýdandardyń biri Sairamnyń áleýmettik - ekonomikalyq damýyna erekshe kóńil bólingen. Aýyldardy damytýǵa basty basymdyq beriledi. Jańa ǵana men aýdanda salynǵan jańa mekteptiń ashylýynda boldym. Jekemenshik mektep salýdan Sairam kósh bastap tur. Bul – úlgili is. Mektep tapshylyǵyn sheshý úshin biyl oblysta 59 jańa mektep salynyp jatyr. Memleket basshysynyń arnaiy tapsyrmasy aiasynda «Jaily mektep» pilottyq ulttyq jobasy aiasynda jańa formattaǵy 86 mektep salynady. Onda 60 myń bala bilim alatyn bolady. Budan bólek, Mankent eldi mekeninde, Aqsý, Aqbulaq aýyldarynda 3 jańa 600 oryndyq mektepterdiń qurylysy josparlanýda», – dedi oblys basshysy eseptik kezdesýinde.
Aýdandaǵy «Aqsý-Mankent-Jibek-Joly» avtomobil joldaryna jalpy quny 1,5 mlrd. teńgeni quraityn kúrdeli jóndeý jumystary qolǵa alynǵan. Kópqabatty turǵyn úilerdiń káriz júieleri jańartylady. «Aýyl – El besigi» jobasy aiasynda biyl Sairam aýdanyndaǵy 7 eldi mekende jalpy quny 1,1 mlrd. teńge quraityn 7 joba iske asyrylýda. Injenerlik infraqurylym júiesin damytý úshin aýdanda 7 biýdjettik investitsiialyq joba júzege asyrylyp jatyr.
Aýdan turǵyndarynyń 220 myńnan astamy aýyz sýmen qamtylsa, al 80%-ǵa jýyǵy tabiǵi gazben qamtylǵan. Alty aýylda ortalyqtandyrylǵan gazben qamtý boiynsha jalpy quny 5,1 mlrd. teńgeni quraityn 4 joba joba júzege asyrylýda.
Aýdandyq mańyzy bar 6 joldy jáne 2 kópirdi kúrdeli jóndeý jumystaryna 2,4 mlrd. teńge bólindi. Biyl aýdanda memlekettik qoldaýymen 4 myńnan astam adam jumysqa ornalasty. Halyqtyń tabysyn arttyrýǵa baǵyttalǵan jumystar ary qarai da jalǵasyn tabady.
Sairamdyqtarmen erkin pikir almasyp, ótinishter men suraqtarǵa jaýap bergen oblys ákimi Darhan Satybaldy barlyq máseleniń zań aiasynda júzege asatynyn atap ótti. Turǵyndardy jeke máseleleri boiynsha qabyldady.
Sairam aýdanyna jumys sapary barysynda oblys ákimi jeke kásipker N.Sýlaimanov salǵan 1200 oryndyq mekteptiń ashylýyna qatysty. Investor Sairamda bir jylda 7 mektep salǵan. Taǵy alty mektep qurylysyn bastaýǵa daiyn. Oblys ákimi Darhan Satybaldy jańadan ashylǵan bilim uiasymen tanysyp, mektep aldyna aǵash otyrǵyzdy.
Oblys basshysy sút ónimderin óndiretin «Aykan» JShS-niń jumysymen tanysty. Kásiporynda sút sarysýynan óndiriste qoldanatyn untaq shyǵaratyn jańa tehnologiia iske qosyldy. Bul – Qazaqstanda balamasy joq qaldyqsyz óndiris.
Aýyl sharýashylyǵy ónimderiniń jármeńkesimen tanysqan oblys ákimi Darhan Satybaldy aýdannyń sharýalarymen júzdesti. Diqandar jylyna birneshe ónim alýdyń syrymen bólisip, memleket tarapynan beriletin kómektiń artqanyna alǵystaryn aitty. Aýdanda óndiriletin ónimderdiń kórmesine qatysqan oblys ákimi memlekettik grant alyp, kásibin bastaǵan azamattarmen kezdesti.
Aimaq basshysy sondai-aq 10 myńnan astam mal basyna arnalǵan mal bordaqylaityn ferma men et óńdeitin tsehta boldy. 56 gektar jerde ornalasqan óndiris orny jylyna 5 myń tonna et óndiredi. 1 myń tonnaǵa jýyq et kórshi elderge eskporttalady. Búgin munda Túrkiiadan arnaiy aldyrylǵan jańa tehnologiia iske qosyldy.
