Túrkistan oblysynyń ákimi Darhan Satybaldy Shardara aýdany turǵyndarymen kezdesti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Júzdesýde turǵyndar tarapynan infraqurylymdy jaqsartý, mektep tapshylyǵy, jol, kanaldardy jóndeý, elektr máseleleri baǵytynda suraqtar qoiylyp, ótinishter aityldy. Ár turǵynnyń máselesi mańyzdy ekenin aitqan óńir basshysy Shardarany damytý boiynsha atqarylǵan jumystarǵa toqtalyp, aldaǵy josparlardy baiandady.
«Bizdiń maqsatymyz – sizdermen erkin pikir almasyp, mańyzdy máselelerdi talqylaý. Sebebi aimaqtyń problemalaryn sizder jaqsy bilesizder. Shardara – oblystyń ońtústik bóligindegi damyp kele jatqan aýdan. Áleýeti óte joǵary. Munda jaǵajai týrizmin, aýyl sharýashylyǵy men kásipkerlikti damytýǵa múmkindik mol. Shardara qalasynda káriz júieleriniń qurylysy júrgizilýde. Aýdandy, aýyldardy damytý jumystary jańa qarqynmen jalǵasyn tabatyn bolady. Menimen birge quqyq qorǵaý organdary men departamentter, basqarmalar basshylary sizderdi tyńdaý úshin túgel kelip otyr. Suraq, aryz- shaǵym, ótinishter qabyldanady. Biz úshin ár turǵynnyń ótinishi mańyzdy», – dedi Darhan Satybaldy.
Jeke jáne birińǵai qabyldaýda da turǵyndar tarapynan ózekti máseleler qozǵaldy. Óńir basshysy árbir usynys pen ótinish hattamaǵa engizilip, tiisti jumys júretinin aitty. Kezdesýge quqyq qorǵaý organdary men basqarma, departament basshylary da qatysyp, eldiń aryz-shaǵymy men ótinishterin tyńdady. Ashyq pikir almasý ótip, kúrdeli túitkilderdiń túiini tarqatyldy. Júzden astam turǵyn basshylarmen erkin pikir almasyp, kókeidegi oilaryn, usynystaryn jetkize aldy.
Búginde Shardara aýdanynyń injenerlik infraqurylym júiesin damytý maqsatynda 13 biýdjettik investitsiialyq joba júzege asyrylyp jatyr. Shardara aýdanyn ortalyqtandyrylǵan gazben qamtý boiynsha 6 joba iske asyrylýda. Oǵan 3,9 mlrd. teńge bólindi, kelesi jyly paidalanýǵa berý josparlanýda.
Halyqtyń tabysyn arttyrý úshin «Túrkistan oblysy boiynsha jumyspen qamtý kartasy» bekitilgen. Biyldyń ózinde Shardarada 897 jumys ornyn ashý josparlansa, qazirgi tańǵa 832 oryn ashyldy. «Eńbek» baǵyty boiynsha aýdanda 9 aidyń qorytyndysymen 2893 adam jumyspen qamtyldy. Sonymen qatar Memleket basshysynyń «10 myń turǵynǵa 100 turaqty jumys oryndaryn ashý» jónindegi tapsyrmasyna sáikes, aýdannyń ekonomikalyq belsendi halyq sanyna qarai 423 jańa jumys ornyn ashý josparlanyp, 607-i ashylǵan.
Eginshilikte paidalanatyn tyńaitqyshtyń erekshe túrin shyǵarýmen ainalysatyn Shardara aýdanynyń jas kásipkerleri Túrkistan oblysynyń ákimi Darhan Satybaldydan biznesterine qoldaý bildirýdi surady. Shylaýshyn ósirip, ony egin sharýashylyǵynda paidalanýdyń jolyn tapqandar memlekettik grant alyp, biznes bastaǵan. Endi ony damytýdy kózdeidi.
Shardara aýdanynda jumys saparymen barǵan Túrkistan oblysynyń ákimi memleket qoldaýymen jeńildikter arqyly óz kásibin júrgizip otyrǵan kásipkerlerdiń taýar kórmesinde boldy. Jańa biznestiń kózin tapqan azamattarmen tildesti. Oblys basshysy kásipkerlerge qoldaý kórsetý joldaryn qarastyrýdy tiisti sala basshylaryna tapsyrdy.
Oblys basshysy «Hamit» AÓK balyq óńdeý zaýytynyń jumysymen tanysty. Bul zaýyttyń balyq ónimderiniń 90 paiyzy shetelge eksporttalyp jatyr. Memlekettik baǵdarlamalar arqyly jeńildetilgen nesieler alǵan. 250 adam jumyspen qamtylǵan. Balyq sharýashylyǵyn odan ári damytý máselesine toqtalǵan oblys ákimi osy salany damytý mańyzdy ekenin aitty.
Sondai - aq aýdanǵa jumys saparynda óńir basshysy Shardara qalasyndaǵy jedel járdem stantsiiasy bar 150 orynǵa arnalǵan aýdandyq emhanaǵa baryp, qurylys barysymen tanysty. Nysan biyl el igiligine beriledi.
