2022-2023 oqý jylynda Túrkistan oblysyndaǵy orta bilim berý uiymdary «BilimLand.kz» tsifrlyq bilim berý platformasyna qosylýy múmkin. Bilim sapasyn arttyrýǵa baǵyttalǵan oqýshylar men muǵalimderge arnalǵan júiege 100% tegin qosylmaq. Tsifrlyq bilim berý platformasy Túrkistan oblysynyń ákimi Darhan Satybaldyǵa tanystyryldy.
«Jańa júie engizilgen jaǵdaida «Bilim Land» jumysyn memlekettik- jekeshelik áriptestik aiasynda júzege asyrady. Ol arqyly 37 pán boiynsha 25 myńǵa jýyq sabaqtar, 3 myńnan asa interaktivti sabaqtar, myńnan asa ǵylymi filmder jáne 70 myńnan asa ulttyq biryńǵai testileý tapsyrmalarynan turatyn bilim berý resýrstaryn oqý protsesinde qoldanýǵa bolady. Platformada mektep pen muǵalimderdiń reitingi shyǵarylady. Bul júie balanyń zeiini men beiimin shyńdap, ustazdardyń biliktiligin arttyratyn qosymsha quralǵa ainalady», deidi «Bilim Land» JShS-ń basshylyǵy.
Oblys ákimine bilim mekemelerine engiziletin býhgalteriia baǵdarlamasy da tanystyryldy. Pilottyq joba Astana qalasy men Pavlodar oblysynda engizilgen. Jańa júieni engizýdegi maqsat – kópshilik úshin bilim salasyndaǵy qarjylandyrýdyń ashyqtyǵyn jáne tiimdiligin baqylaýdy qamtamasyz etý. Býhgalteriiany, kadrlardy, esepke alý men biýdjetti josparlaýdy avtomattandyrý sybailas jemqorlyq táýekelderin aldyn alýǵa jáne qarjyny tiimdi paidalanýdy arttyrýǵa jaǵdai jasaidy.
Bilimniń sapasyn kóterýdiń asa mańyzdylyǵyn aitqan oblys ákimi Darhan Satybaldy jańa jobalardy tolyq zerttep, zerdeleýdi tapsyrdy. Óńirdegi internetke qoljetimdilikti kúsheitýdiń qajettiligin aitty.
«Bilim sapasyn kóterý – eń úlken maqsatymyz. Bul baǵyttaǵy jumystardy kúsheitemiz. Sapaly bilim berý – oqytý men tárbieleýdiń úzdiksiz úrdisi. Balanyń boiyndaǵy bar qabiletin kemeline keltirip jetildirýde muǵalimniń róli zor. Biliktilikti arttyrý arqyly bilim sapasyn kóterýge bolady. Bizdiń oblysta bala sany da, mektep sany da kóp. Sizderdiń maqsattaryńyz túsinikti. Biraq bul jobalardy egjei-tegjeili zertteý kerek. Naqty sheshimdi sodan keiin ǵana qabyldaýǵa bolady», – dedi Darhan Satybaldy.
Túrkistan oblysynda 900-den astam mektep bar. Onda 500 myńnan astam bala bilim alady.
