Ishki ister ministrligi «Doping» jedel aldyn alý is-sharasyn ótkizdi, dep habarlaidy "Ult aqparat".
Bul sharanyń negizgi mindeti – esirtki, psihotroptyq nemese ýly zattarmen jumys isteý erejelerin, farmatsevtikalyq qyzmet erejelerin jáne esirtki ainalymy salasyndaǵy úi-jailarǵa qoiylatyn talaptardyń saqtalýyn anyqtaý. Reid barysynda politsiia qyzmetkerleri óz qyzmetinde esirtki, psihotroptyq zattar men prekýrsorlardy paidalanatyn kásiporyndar men uiymdardy tekserdi.
Esirtki qylmysyna qarsy is-qimyl departamentiniń aqparaty boiynsha, 5 kún ishinde elimizde 78 ákimshilik quqyqbuzýshylyq anyqtalǵan. Olardyń 44-i dárihanalarda dári-dármekti retseptisiz jiberýmen bailanysty bolyp otyr. Quramynda esirtki jáne psihotroptyq zattar bar meditsinalyq preparattardyń 6 myńǵa jýyq tabletkasy men ampýlasy tárkilengen.
«Mysaly Aqtóbe oblysyndaǵy bir meditsinalyq mekemeni tekserý barysynda zańsyz saqtalǵan 90 ampýla morfin men 2500 ampýla fentanil tárkilendi. Kináli laýazymdy adamdarǵa qatysty qylmystyq is qozǵaldy.
Budan basqa operatsiia kezeńinde esirtkiniń zańsyz ainalymy salasynda 51 qylmys, onyń ishinde 27 ótkizý faktisi, 23 esirtkini asa iri mólsherde saqtaý jáne 1 kontrabanda faktisi anyqtaldy. Máselen, elordalyq esirtkimen kúres politseileri buryn sotty bolǵan 39 jastaǵy jergilikti turǵyndy ustady. Odan 20 kelige jýyq oralǵan jáne satýǵa daiyn gashish tárkilengen. «Qara naryqta» onyń baǵasy 30 mln teńgeni quraityn edi», - dep habarlaidy ministrlikten.
Osyǵa uqsas taǵy bir faktini Qostanai oblysynyń esirtkige qarsy kúres politseileri anyqtaǵan. Jetiqara qalasynyń turǵyny óz úiiniń edeniniń astynda 500 gr shamasynda geroin saqtaǵan. Tintý barysynda poltseiler esirtkiden basqa, tarazy men qomaqty somany tárkiledi. Aita keteiik, geroinniń asa iri mólsheri 1 grammdy quraidy. Al ony saqtaǵany úshin úsh jyldan jeti jylǵa deiin bas bostandyǵynan aiyrý jazasy qarastyrylǵan.
Anyqtalǵan barlyq fakti boiynsha qylmystyq ister qozǵaldy.
