Oralda meditsina qyzmetkerlerin emtihansyz attestattap kelgen zańsyz shema áshkerelendi. Tergeý málimetinshe, tórt adam jeti jyl boiy dárigerlerdiń ornyna onlain test tapsyryp, shamamen 4 million teńge tabys tapqan, dep habarlaidy ult.kz.
Sot materialdaryna sáikes, sertifikat nemese biliktilik sanatyn alǵysy kelgen meditsina qyzmetkerleri deldaldarǵa júgingen. Uiymdastyrýshylar AnyDesk jáne Radmin baǵdarlamalary arqyly kompiýterlerge qashyqtan qosylyp, test suraqtaryna úmitkerlerdiń ornyna jaýap bergen.
Tergeý nusqasy boiynsha, shemany "Táýelsiz emtihan alýdyń ulttyq ortalyǵynyń" óńirlik sarapshysy uiymdastyrǵan. Al zańsyz attestatsiiadan ótken meditsina qyzmetkerlerine tólengen ústemaqy kólemi 16,5 million teńgege jetken.
Aiyptalýshylar kinálaryn tolyq moiyndady. Sot olardyń árqaisysyna bir jyl bas bostandyǵyn shekteý jazasyn taǵaiyndady. Alaida Konstitýtsiianyń 30 jyldyǵyna orai jariialanǵan raqymshylyqqa bailanysty olar negizgi jazadan bosatyldy. Úkim ázirge zańdy kúshine engen joq.
