«Aq jol» fraktsiiasynyń depýtattary ótemaqy ala almaǵan dárigerlerdiń máselesin kóterip, Úkimet basshysyna depýtattyq saýal joldady, dep habarlaidy QazAqparat.
«21 qazanda Densaýlyq saqtaý ministrligi COVID-19 aýrýymen aýyrǵan meditsina qyzmetkerlerine tólem berilmeitinin habarlady. Vitse-ministr Marat Shoranov aitqandai, men naqty sózin keltireiin: «Bul saqtandyrý jaǵdaiy emes, bul tótenshe jaǵdai men karantin kezeńinde bolǵan táýekel úshin bir rettik tólem boldy. Qazir aýrýhanalarǵa artyq salmaq túsip turǵan joq, dárigerlerdiń ólim qaýpi nólge teńesti». Eger dárigerler men medbikeler infektsiiany juqtyrsa Densaýlyq saqtaý ministrligi olardy kásipodaqtar men jergilikti atqarýshy organdardyń esebinen qoldaý sharalaryn qarastyrýdy usynady», - deidi Azat Perýashev Úkimet basshysyna joldaǵan depýtattyq saýalynda.
Onyń aitýynsha, Densaýlyq saqtaý ministrliginiń bul sheshiminen týra eki apta buryn Prezident koronavirýs pandemiiasynyń ekinshi tolqynyna daiyndyq jónindegi keńeste meditsina qyzmetkerlerine bonýstardy «sandarmen oiyn» jasamai, biýrokratiialyq kedergilerdi toqtatyp, tez arada tóleýge buiryq bergen.
Al osydan birneshe kún buryn «Nur Otan» fraktsiiasynyń depýtattarynyń keńeitilgen otyrysynda depýtattar sheneýnikterdiń biýrokratiiasyna bailanysty meditsina qyzmetkerlerine tólenetin tólemderdiń buzylýynyń kóptegen faktilerin qatal synǵa alǵan.
«Aq jol» fraktsiiasynyń depýtattaryna ártúrli aimaqtardaǵy dárigerlerden shaǵym kóp túsip jatyr. Eń qiyn kezeńde otbasyn kórmei, aýrýhanada basyn báigege tikken dárigerler qazir kabinetterde taban tozdyryp, biýrokratiianyń zardabyn shegýde. Al Densaýlyq saqtaý ministrliginiń Prezidenttiń tapsyrmalary men qoǵamnyń narazylyǵyna degen «jaýaby» osy. Kerisinshe koronavirýsqa qarsy soǵystyń aldyńǵy shebinde júrgen dárigerlerge memleket qamqorlyq jasaitynyn jáne qiyn-qystaý kezde olardy qoldaitynyn kórsetý mańyzdy bolar edi. Vitse-ministr jergilikti biýdjetke jáne meditsinalyq qyzmetkerlerdiń kásipodaqtaryna tólenbegen tólemder úshin jaýapkershilikti júktegendikten, biz bul organdardyń múmkindikterin bilýge tyrystyq. Esterińizge sala keteiik, buryn jumys ornynda aýyryp qalǵan dárigerlerge - 2 million teńge, qaitys bolǵan jaǵdaida olardyń otbasyna - 10 million teńge tólenetin bolǵan», - deidi ol.
Azat Perýashev bul jaǵdaida kásipodaqtar emdeý járdemaqysy retinde 3 ailyq kólemindegi tólemdi bere alatynyn habarlaǵanyn jetkizdi.
«Búkil otbasy uzaq ýaqyt boiy emdelip jatsa bul aqsha jetpei de qalýy múmkin. «Aq jol» depýtattyq fraktsiiasy bizdiń dárigerlerdiń janqiiarlyǵyna degen osyndai kózqarasqa narazylyǵyn bildiredi. Densaýlyq saqtaý ministrligi óz sózinde turmaǵany ma? Biraq eger vitse-ministr aitqandai, infektsiia qaýpi «nólge deiin tómendetilse», onda biýdjettiń shyǵyndarynan qorqatyn ne bar? Mundai sheshimnen memlekettiń bedeldik shyǵyndary áldeqaida qymbat bolady. Úkimetten osy máseleni qaita qarap, atalǵan tólemderdi saqtap qalýyn suraimyz. Áitpese, qiyn sátte bizdiń azamattarymyzdy qutqaratyn eshkim bolmai qalýy múmkin. Dárigerler men meditsina qyzmetkerleriniń jetispeýshiliginiń mundai jaǵdaiy maýsym-shilde ailarynda bolǵan, onda eki medbike kúndiz-túni tósek arasynda júgirip ótip, ondaǵan naýqasqa júieler men ottegi apparattaryn ornatqan. Qalai bolǵanda da biz qalǵan dárigerlerge kómektesý úshin stýdentter men eriktilerdi shaiqasqa qalai laqtyrǵanymyzdy tez umytyp kettik», - dedi ol.
