«Dárigerler - búgingi kúnniń batyrlary deýge ábden laiyq. Meditsina mamandary óz densaýlyǵyna qaýip tónip turǵanyna qaramastan halyqtyń densaýlyǵy úshin kúresip keledi». Bul - Qyzylorda oblysy Qarmaqshy aýdanynyń turǵyny, zeinetker Tamara Eshmanovanyń júrekjardy lebizi, dep habarlaidy QazAqparat.
Onyń aitýynsha, aldymen joldasy, balasy men kelini syrqatqa shaldyǵyp, aýrýhanada em alǵan. Ózi úide 10 kúndei aýyryp júrgen.
«Asqa tábetim bolmai, shaidy ǵana talǵajaý etip júrdim. Sonyń saldarynan aǵzamda álsireý bastaldy. Oǵan qosa aiaq-qolym da uiyp, ábden mazam qashty. Tynysym tarylyp, qalypty densaýlyǵym ózgeshe kúige tústi. Aýrý ábden maza bermegennen keiin dárigerler kómegine júginýdi jón kórdim. Úige kelgen jedel járdem dárigerleri meni aýrýhanaǵa alyp ketti. Eki meditsina mamany aldymen alǵashqy meditsinalyq kómek kórsetti. Sodan keiin infektsiialyq bólimdegi jansaqtaý bólimine jatqyzýǵa sheshim qabyldady. Atalǵan bólim meńgerýshisi Ádilbek Málikov, terapevt-dárigerler Dinara Júsipova, Altynai Júsipova men Naýryz Qozanov, medbikeler ár naýqasqa tynym tappai kómek kórsetti. Bilikti mamandar 4-5 saǵat ishinde densaýlyǵymdy qalpyna keltirdi. Sodan keiin palataǵa aýystyrdy. Bas dáriger Baqytjan Nysanbaev udaiy bólimde emdelip jatqan naýqastardyń jaǵdaiyn surap-bilip júrdi», - deidi Tamara Eshmanova.
Ol kisi osy ýaqytqa deiin aq halatty abzal jandardyń eńbegi eleýsiz qalyp júrgenin tilge tiek etti. Qazir olar óz densaýlyǵyna qaramastan aýyrǵandardyń amandyǵy úshin kúresip júr.
«Antyna adal dárigerlerdi búgingi kúnniń naǵyz batyrlary desek, ábden jarasady. Baqytjan Nysanbaev basqaratyn aýrýhana ujymyna aitar alǵysymyz sheksiz. Sol dertińe shipa tanytqan mamandardyń arqasynda aýyr indetti jeńip shyqtym. Olar qyzmet barysynda em-domnan bólek, psihologiialyq turǵydan zor kómek kórsetip, ómirge degen qulshynysymyzdy arttyrdy. Búginde otbasymyz túgeldei jazylyp, úiimizge aman-esen oraldyq. Bul synaqtan da aman-esen óterimizge senim mol», - dedi Tamara Eshmanova.
