Almatylyq dárigerler pyshaq jaraqatyn alǵan Denis Tendi aman alyp qalýǵa baryn salypty. Alaida, sportshy aýrýhanaǵa jetkizilgende klinikalyq ólimde bolǵandyqtan, ony qutqarý múmkin bolmaǵan. Bul týraly Almaty Ortalyq klinikalyq aýrýhanasy bas dárigeriniń mindetin atqarýshy Erjan Quttyǵojin aitty, dep habarlaidy QazAqparat tilshisi.
«Denis Ten aýrýhana jetkizilgende klinikalyq ólimde boldy. Jedel járdem kóliginde júrek pen ókpege reanimatsiialyq áreketter júrgizildi. Reanimatsiialyq sharalar aýrýhanada da 2,5 saǵat jalǵasty. Patsient tolyǵymen otaǵa daiyn boldy. Biraq, es-tússiz jatqandyqtan, klinikalyq ólimde bolǵandyqtan, otaǵa deiin jetken joq. Ókinishke orai, ol 17:30-da qaitys boldy», - dedi Erjan Quttyǵojin.
Aita ketý kerek, qalalyq IID baspasóz qyzmetiniń habarlaýynsha, oqiǵa Qurmanǵazy Baiseiitova kósheleriniń qiylysynda búgin túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan.
Sportshy oń jaq sanynyń joǵarǵy tusynan jaraqat alǵan.
