Oppozitsiialyq saiasatker Aleksei Navalnyidy emdegen dárigerler azamattyq aýrýhanada saiasatkerdiń densaýlyǵyna diagnostika júrgizilgenin habarlady. Olar advokattar arqyly meditsinalyq qorytyndy men analiz nátijelerine qol jetkizgen. Dárigerler Navalnyidan ashtyqty dereý toqtatýdy surap otyr. Olardyń málimdemesi "Mediazona" saitynda jariialandy, saiasatkerge juma kúni tabystalady, dep habarlaidy Azattyq.
Úndeýge qol qoiǵan dárigerlerdiń sózine araǵanda, diagnostika 20 sáýirde júrgizilgen. Oppozitsionerdi Vladimir oblysynyń bas nevrology, neirohirýrg, shtattan tys bas nefrology qaraǵan. Navalnyiǵa táýelsiz dárigerler tobynyń ótinishine sai diagnostika júrgizilgen.
"Bizdiń basty maqsatymyz – patsienttiń ómiri men densaýlyǵyn saqtap qalý. Eger ashtyq taǵy jalǵassa, ókinishke qarai jaqyn arada odan aiyrylyp qalýymyz múmkin" delingen úndeýde. Oǵan bes dáriger qol qoiǵan.
Navalnyi ózine táýelsiz dárigerlerdi jiberýdi talap etip, 31 naýryzdan beri ashtyq ustap jatyr. Onyń aldynda saiasatker beliniń aýyratynyna, aiaǵynyń uiitynyna jáne túrmede qajetti dárejede meditsinalyq kómek kórsetpeitinine shaǵymdanǵan. FSIN saiasatkerge oidaǵydai kómek kórsetip jatqanyn habarlaǵan. Navalnyidyń omyrtqa diskinen "gryja" tabylǵan.
Úndeýde Navalnyidyń dárigerleri ózderin patsientke jiberýdi surap, Vladimirdegi dárigerler konsiliýmyna qatysý saiasatkerge kómek bolar edi dep ótinish aitqan. Biraq dárigerler ótinishtiń oryndala qoiatynyna da senbeidi.
21 sáýirde Resei qalalarynda oppozitsionerdi qoldaý aktsiialary ótip, narazylar táýelsiz dárigerlerdi Navalnyiǵa kirgizýdi talap etken. Shamamen 1700-den astam adam ustalǵan.
Beisenbi kúni Navalnyi Instagram-da málimdeme jariialap, narazylyqqa qatysqandarǵa alǵys aitty. "Keshe sizder menimen birge shyqtyńyzdar, al búgin tósekte jatyp, sizdermen birge ketip bara jatqanymdy elestetip qiialdaimyn" dep jazdy. Onyń aýrýhanadan túrmege aýystyrylǵany-aýystyrylmaǵany belgisiz.
