QR Premer-Ministri Asqar Maminniń tóraǵalyǵymen ótken Úkimet otyrysynda Densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasyn iske asyrý qorytyndylary jáne 2020-2025 jyldarǵa arnalǵan jobasy qaraldy, dep habarlaidy "Ult aqparat" primeminister.kz saityna silteme jasap.
QR densaýlyq saqtaý ministri E. Birtanov ótken kezeńde qol jetkizilgen nátijeler jáne jańa Memlekettik baǵdarlamanyń negizgi baǵyttary týraly, Ulttyq ǵylymi kardiohirýrgiialyq ortalyqtyń basqarma tóraǵasy Iu. Pia meditsinalyq qaýymdastyqtyń pozitsiiasy týraly baiandady.
3 jyl ishinde «Densaýlyq» memlekettik baǵdarlamasyn iske asyrýǵa shamamen 513 mlrd teńge bólindi. Elimizde negizgi meditsinalyq-demografiialyq kórsetkishter jaqsardy, ortasha ómir súrý uzaqtyǵy 73 jasqa jetti.
«Tuńǵysh Prezident – Elbasy Nursultan Ábishuly Nazarbaev meditsinalyq kómektiń sapasyn jaqsartý, alǵashqy meditsinalyq-sanitariialyq kómekke jumsalatyn shyǵystardy 60%-ǵa deiin ulǵaitý boiynsha naqty tapsyrmalar berdi. Memleket basshysy Qasym-Jomart Kemeluly Toqaev aýrýlardyń aldyn alý jáne salaýatty ómir saltyn nasihattaý boiynsha sharalar qabyldaýdy, meditsinalyq uiymdardyń qadamdyq qoljetimdiligin qamtamasyz etýdi tapsyrdy», — dedi A. Mamin.
Úkimet basshysy jańa Memlekettik baǵdarlama aiasynda halyqty salaýatty ómir saltyna beiimdeý úshin qoǵamdyq densaýlyq saqtaý qyzmeti jańǵyrtylatynyn atap ótti. Jalpy salaýatty ómir salty mádenietin qalyptastyrýǵa baǵyttalǵan sharalardy keńeitý josparlanǵan.
«Meditsinalyq kómek sapasyn arttyrý, densaýlyq saqtaýdyń biryńǵai tsifrlyq keńistigin qurýdy aiaqtaý boiynsha sharalar qabyldanady. Ol úshin aýrýlardy erte anyqtaýǵa yntalandyrý maqsatynda emhanalar men aýrýhanalardy qarjylandyrý jetildiriledi», — dedi A. Mamin.
Premer-Ministr barlyq óńirlerde meditsinalyq qyzmet kórsetýdiń jańa tehnologiialary engizilip jatqan alǵashqy meditsinalyq kómek kórsetýdiń ozyq tájiribe ortalyqtaryn damytý jalǵasatynyn atap ótti.
Meditsina qyzmetkerleriniń statýsyn arttyrý úshin meditsinalyq kadrlyq resýrstardyń ulttyq júiesi qurylady.
«Dárigerler men meiirbikelerdiń jalaqysy orta eseppen 2 ese artyp, olardy áleýmettik qoldaý sharalary kúsheitiledi, sondai-aq kásibi jaýapkershilik sharalary da kúsheitiledi. Jalpy bir dárigerdiń júktemesi Ekonomikalyq yntymaqtastyq jáne damý uiymynyń deńgeiine deiin azaiady (1500 adamǵa 1 dáriger)», — dedi A. Mamin.
Úkimet basshysy meditsina salasyndaǵy investitsiialyq ahýaldy túbegeili jaqsartý jáne jobalyq basqarýdy engizý josparlaryn atap ótti.
«Alǵash ret salaǵa 2,8 trln teńge qarjy bólý josparlanǵan, sonyń ishinde, 2,2 trln jeke investitsiialar. Osy qarajat esebinen 431 densaýlyq saqtaý obektisi salynady, onyń ishinde 10 myń orynǵa arnalǵan, halyqaralyq deńgeidegi 19 kópsalaly aýrýhana memlekettik-jekeshelik áriptestik mehanizmi arqyly salynady. Bul aýrýhanalardaǵy emdeý oryndaryn 50%-ǵa ulǵaitýǵa, meditsinalyq nysandarynyń tozýyn 56%-dan 38%-ǵa deiin azaitýǵa múmkindik beredi», — dedi A. Mamin.
Premer-Ministr osy sharalardyń barlyǵy meditsinalyq infraqurylymdy jaqsartýǵa jáne aýrý-syrqaýdyń deńgeiin azaitýǵa jáne qazaqstandyqtardyń ortasha ómir súrý uzaqtyǵyn 2025 jylǵa qarai 75 jasqa deiin jetkizýge yqpal etetinin atap ótti.
