Qazirgi ýaqytta Astanada qyzylsha aýrýynyń jalpy maýsymdyq kóterilýi bastaldy. Bul derttiń aldyn alýdyń negizgi joly – vaktsinany ýaqytyly jasaý. Bul týraly Astana qalasy Qoǵamdyq densaýlyq saqtaý departamentiniń basshysy Sádýaqas Baiǵabylov Ortalyq kommýnikatsiialar qyzmetinde ótken brifing barysynda aitty.
Qyzylsha – araǵa 2-3 jyl salyp órshýi artyp otyratyn maýsymdyq aýrý túri. Astana boiynsha 2013 jyly qyzylshamen aýyrǵan 8 jaǵdai tirkelse, 2014 jyly 50, 2015 jyly 396, 2016 jyly 6 jaǵdai tirkelgen. Al 2017 jyly qala boiynsha eshkim bul diagnoz boiynsha aýyrmaǵan.
«Qazirgi ýaqytta qalalyq balalar juqpaly aýrýlar aýrýhanasynda 35 bala qyzylsha aýrýy bolýy múmkin belgilerimen jatyr. Olardyń jaǵdailary turaqty. Onyń 3-i aýrýhanadan shyqty, al 15-inde saraptamalyq negizde qyzylsha diagnozy rastaldy. Astanadaǵy jaǵdai Qoǵamdyq densaýlyq saqtaý basqarmasynyń baqylaýynda», - deidi Astana qalasy Qoǵamdyq densaýlyq saqtaý departamentiniń basshysy Sádýaqas Baiǵabylov.
Ol qyzylshanyń aldyn alýdyń eń tiimdi joly – vaktsinatsiia ekenin aitty.
«Qyzylshamen ádette 1-6 jas aralyǵyndaǵy balalar ǵana aýyrady. Biyl qyzylsha dertimen bir ǵana eresek adam aýyrdy. 31 jasar er adam qazirgi ýaqytta juqpaly aýrýlar aýrýhanasynda emdelip jatyr», - deidi ol.
Astana qalasy Qoǵamdyq densaýlyq saqtaý basqarmasy basshysynyń orynbasary Gaýhar Shapataeva vaktsina jasatýdan bas tartatyndardyń sany artqanyn málimdedi.
«Vaktsinadan bas tartý sońǵy kezderi aitarlyqtai kóbeiip ketti. Ártúrli dini aǵymdaǵy kózqarastaǵy jáne ǵalamtor júiesindegi alyp-qashpa aqparattarǵa senetin ata-analar balalaryna vaktsinatsiia jasatýdan bas tartady. Búgingi kúni aýyryp jatqan balalar óz ýaqytynda vaktsina almaǵan balalar arasynda tirkelip otyr», - deidi ol.
Qyzylshaǵa qarsy vaktsina QR Densaýlyq saqtaý ministrliginiń arnaiy sertifikatymen alynady jáne qaýipsiz ekeni arnaiy zerthanalarda dáleldenip, sapasy boiynsha kepildik beriledi.
«Qyzylshaǵa qarsy vaktsina balaǵa bir jasta, al revaktsina alty jasta salynady. Qyzylshaǵa qarsy vaktsinada osy kúnge deiin asqyný jaǵdaiyn týdyratyn jaǵdailar bolǵan emes», - Gaýhar Shapataeva.
