QR DSM respýblikalyq densaýlyq saqtaýdy damytý ortalyǵynyń bas direktory Qanat Tósekbaev eldegi meditsina mamandarynyń ne sebepti jumystan ketetinin aityp berdi, dep habarlaidy QazAqparat.
«Meditsina mamandary tapshylyǵynyń negizgi sebebi – qyzmetkerlerdiń bir orynda turaqtamaýy bolyp otyr. Óitkeni, eńbekaqy tóleý júiesi tolyq jetilmegen, meditsina qyzmetkerlerin yntalandyrý, quqyqtyq qorǵaý men áleýmettik qoldaý da óte tómen. Biylǵy 10 qazanda júrgizilgen zertteýge sáikes, bir jylda 31 129 medqyzmetker (dárigerler men ortasha meditsinalyq qyzmetkerler) jumystan shyqqan. Bul kórsetkish byltyrǵydan 9,3% tómen», - dedi Q. Tósekbaev Ortalyq kommýnikatsiialar ortalyǵynda ótken onlain brifingte.
Jumystan shyǵýdyń negizgi sebepteri retinde qyzmetkerdiń ótinishi, taraptardyń kelisimi, shtattyń qysqarýy jáne basqa da jaittar kórsetilgen. Basqa jaittar arasynda mamannyń qaitys bolýy, aýrýǵa ushyraýy, múgedektik jáne zeinet jasyna shyǵý sebepteri bar.
«Syrtqy migratsiia boiynsha Shyǵys Qazaqstan, Soltústik Qazaqstan jáne Qaraǵandy oblystary kósh bastap tur. 2019 jyly meditsinalyq bilimi bar 1212 maman Qazaqstan aýmaǵynan kóship ketken. Olardyń kóshýiniń basty sebepteri – tiimdi yntalandyrý tásilderiniń bolmaýy, psihoemotsiialyq júkteme, kásibi damý múmkindikteriniń bolmaýy, quqyqtarynyń tómen dárejede qorǵalýy jáne áleýmettik kepildikterdiń bolmaýy.
Sonymen birge, meditsinalyq bilimi bar mamandardyń ishki migratsiiasyna 11278 adam qatysqan. Ásirese, Túrkistan oblysy men Nur-Sultan, Almaty qalalaryna meditsinalyq mamandar kóptep aýysqan.
Aita keteiik, Qazaqstanda 4122 shtattyq orynǵa dárigerler qajet. Ásirese, anesteziolog-reanimatolog, terapevt, jalpy praktikalyq dáriger, zerthanashy dáriger, akýsher-ginekolog, infektsiialyq dárigerler jetispei jatyr. Orta meditsinalyq qyzmetkerler arasynda 8583 bos shtattyq oryn bar.
