Parlament Senatynyń jalpy otyrysynda depýtat Nurtóre Júsip meditsina salasy mamandaryn daiarlaýdaǵy problemalardy kóterdi, dep habarlaidy "Ult aqparat".
«Qazirgi tańda Qazaqstanda 230 myń meditsina qyzmetkeri bar, onyń ishinde 70 myń dáriger, 160 myńnan astam orta meditsina personaly jumys isteidi. Álem ózgerdi: jańa tehnologiia tez damyp jatyr, soǵan sáikes qoǵamnyń da suranys talaby artyp otyr. Myńdaǵan bilikti dáriger halqymyzdyń densaýlyǵyn kirpik qaqpai kúzetip turǵanyn da aitýymyz kerek. Biraq osy zamanǵy apparatýrasy bar eń jaqsy materialdyq-tehnikalyq baza degenińiz kásibi mamandarsyz, adam faktorynsyz qur ásheiin temir ǵana bolyp qalmaq. Is júzinde onymen jumys isteitin myqty maman tabyla bermeidi. Kúndelikti ómirde naýqas adamdy emdeýden buryn diagnozdy dál qoiý máselesiniń ótkir turǵandyǵyn kórip júrmiz. Diagnoz durys qoiylmaǵandyqtan onyń arty qanshama qaiǵyly jaǵdaiǵa dýshar etýde», - dedi senator QR Úkimet basshysynyń orynbasary Berdibek Saparbaevtyń atyna joldaǵan depýtattyq saýalynda.
Onyń aitýynsha, jyl saiyn meditsina salasyna joǵary oqý oryndaryn bitirgen júzdegen jas maman keledi. Solardyń kóbisiniń qajetti bilimi men daǵdysy, dárigerlik mashyǵy nashar.
«Olardyń kóbisi derbes jumys isteýge ázir bolmai shyǵady, operatsiia stolynda bir sát turyp kórmegen, ozyq tehnikamen jumys isteýdi bilmeitin tájiribesiz mamannan ne kútýge bolady? Tipti ineniń ózin durys shanshi almaityndar kezdesedi. Sebepsiz saldar bolmaidy.Tiisti salaǵa mamandanbaǵan joǵary oqý oryndarynda dárigerlerdi daiarlaý isine jol berip otyrmyz. Eldegi birqatar pedagogikalyq, jekemenshik ýniversitetter dáriger kadrlaryn oqytýǵa kóshti. Basqa salada eksperiment jasaýǵa bolatyn shyǵar, biraq dál meditsina salasynda mundai eksperiment jasaýǵa bolmaidy. Dárigerlerdi tek qana osy salaǵa baǵdarlanǵan, tereń tarihy men zamanaýi múmkindigi zor, burynnan qalyptasqan ýniversitetterde ǵana oqytý qajet dep esepteimin», - dedi N. Júsip.
Osy oraida depýtat profildi emes joǵary oqý oryndarynyń janynan meditsina fakýltetterin ashýdyń qandai qajettigi bar ekendigin surady.
«Mundai fakýltetterdiń klinikalyq, qarjylyq, uiymdastyrýshylyq múmkindikteri qanshalyqty? «Kadr tapshylyǵyn joiamyz» dep júrip, biliksiz kadrlar qaptap ketse, kúni erteń kim jaýap beredi?», - dedi senator.
