© Photo: Nursultan Nazarbaev qory
Qarjy ministrliginiń memlekettik kirister komiteti Dariǵa Nazarbaeva men Nurbol Nazarbaevtyń tabys deklaratsiiasyn tapsyrǵanyn rastady, - dep habarlaidy Sputnik Qazaqstan.
Ortalyq kommýnikatsiialar qyzmetinde ótken jalpyǵa birdei deklaratsiialaýǵa arnalǵan brifingte jýrnalister salyqshylardan memlekettik qyzmette istegen Dariǵa Nazarbaeva men Nurbol Nazarbaevtyń tabys esebi týraly surady.
"Deklaratsiialaýdyń birinshi kezeńi 2021 jyly bastalǵan. Sol kezde memlekettik qyzmetshilerge tabys deklaratsiiasyn tapsyrý mindeti júkteldi. Dariǵa Nazarbaeva kezinde memlekettik qyzmette jumys istedi. Bolat Nazarbaevtyń uly – Nurbol Nazarbaev ta quqyq qorǵaý salasynda qyzmet etti. Biraq olar qyzmetten ketkennen keiin Forbes-tiń tizimine ilikti. Osy kisiler kezinde deklaratsiia tapsyrdy ma? Tabysyn kórsetti me?", - dep surady tilshiler.
Memlekettik kirister komitetiniń departament direktory Nurjan Qýandyqovtyń aitýynsha, Nazarbaevtar tabys deklaratsiiasyn tapsyrǵan.
"Siz aitqan adamdardyń barlyǵy deklaratsiiany tapsyrdy. Óitkeni búkil memlekettik qyzmetshi tabys deklaratsiiasyn tapsyrýy kerek edi. Biraq qandai somalar jáne ne bar ekenin jariialai almaimyz. Óitkeni ondai málimet salyq kodeksimen qorǵalady", - dep atap ótti Qýandyqov.
Osy oraida jýrnalister ofshorlyq esep-shottardyń bar-joǵyn da surady. Biraq departament basshysy ondai málimet te Salyq kodeksi boiynsha qupiia sanalatynyn jetkizdi. Ony jariialaýǵa bolmaidy.
