Senat tóraǵasy Dariǵa Nazarbaeva agrarlyq sektordy júiesiz reformalaýdyń saldarynan tutas aýyldar joiylyp ketip jatqanyn málimdedi, dep habarlaidy "Ult aqparat".
"Agrarlyq sektordy turaqty túrde júiesiz reformalaý jyldary aýyl sharýashylyǵyn daǵdarysqa, óndiristiń kúrt quldyraýyna, óndirýshiler tabysynyń tómendeýine, aýylsharýashylyǵy ónimderiniń, shikizat pen azyq-túlik baǵasynyń kóterilýine jáne basqa da keleńsiz jaǵdailarǵa alyp keldi", - dedi Nazarbaeva agroónerkásip keshenin damytý máseleleri týraly parlamenttik tyńdaýda.
Aitýynsha, júiesiz reformalar kezinde aýyl sharýashylyǵynda jumys kúshi qunsyzdanyp, aýyldarda jumys oryndary azaidy. Áleýmettik infraqurylym nysandary men áleýmettik-turmystyq qyzmetter qysqarǵan.
"Aýyl turǵyndarynyń sany azaiyp, birtindep bútin eldimekender joiylyp ketip jatyr", - dep alańdady senat spikeri.
Nazarbaeva sandyq jáne paiyzdyq kórsetkishterge qaramastan, sońǵy on jylda aýyl sharýashylyǵy toqyraýǵa ushyraǵanyn qadap aitty.
Aýyl sharýashylyǵynyń JIÓ úlesi on jyl ishinde 5 protsentten aspaǵan, al keiingi jyldary turaqty túrde tómendep barady.
"Kóbine kesteler men sandardyń artynda adamdardyń naqty problemalary turǵanyn kóre bermeimiz. Biz salanyń áleýmettik ólshemine nazar aýdarýymyz kerek. Aýyldyń turmys salty men ómir filosofiiasy qaladaǵy ómirden múldem ózgeshe. Statistika komitetiniń málimetteri boiynsha, osy jyldyń 1 qańtarynda ekonomika salasyndaǵy eń tómengi jalaqy aýyl sharýashylyǵynda bolǵan", - dedi Nazarbaeva.
Ol bul máselelerdiń bári memleket nazarynan tys qalmaǵanyn atap ótti.
Onyń sózine qaraǵanda, 2010 jyldan beri Qazaqstanda 3 memlekettik baǵdarlama qabyldanǵan. Agroónerkásiptik keshendi damytýdyń qoldanystaǵy úshinshi memlekettik baǵdarlamasy 2021 jyly aiaqtalady.
Statistika komitetiniń málimetinshe, 2017 jyldan bastap 2019 jylǵa deiin aýyl sharýashylyǵynyń jalpy ónimi 4,5 trillion teńgeden aspaǵan. 2021 jylǵa qarai salany damytý baǵdarlamasy aiasynda ony 8,2 trillionǵa deiin ósirý josparlanyp otyr.
"Baǵdarlamany júzege asyrýdyń úsh jylynda 2 trillion teńgege jýyq qarajat tek agroónerkásip keshenin sýbsidiialaýǵa jumsalǵan. Memleket bul salany belsendi damytýǵa alǵysharttar jasap, jaǵdaidy jaqsartý úshin únemi sharalar qabyldap júr dep bilemiz. Aýyl turǵyndary júzege asyrylyp jatqan memlekettik baǵdarlamalardan eń kóp jeńildikter men járdemaqy alýshylar qatarynda dep esepteimiz. Biraq is júzinde baǵdarlamalar aýyl turǵyndarynyń ál-aýqatyn jaqsartyp jatyr ma? Bizge memlekettik baǵdarlamalardyń sátti ári nátijeli júzege asyrylýyna ne kedergi ekenin túsiný kerek", - dedi spiker.
Nazarbaeva aýyl sharýashylyǵy damyǵan elderdiń tájiribesin zerttep, Qazaqstannyń óz damý jolyn tańdaýǵa shaqyrdy.
