Senat depýtaty Dariǵa Nazarbaeva qarjy ministrliginde týyndap otyrǵan múddeler qaqtyǵysy máselesin qozǵady, dep habarlaidy Sputnik Qazaqstan tilshisi.
Nazarbaevanyń aqparatyna súiensek, Búkilálemdik banktiń sońǵy esebi boiynsha, sybailas jemqorlyq jailaǵan memlekettik organdar – salyq jáne keden uiymdary eken. Osy oraida senator ekonomikalyq tergeý qyzmetiniń jumysy qanshalyqty tiimdi degen saýal tastady.
"Múddeler qaqtyǵysy máselesi qaralyp otyr. Eń jemqor vedomstvolar - qarjy ministrliginde. Oǵan qosa qarjy ministrligi Ekonomikalyq tergeý qyzmetin basqarady. Sonda olar ózin-ózi tergep, ózin-ózi jazalaýy kerek", — dedi senator.
Sondai-aq, ol sońǵy jyldary jemqorlyq qylmystarymen ainalysatyn Qarjylyq monitoring komitetiniń (qarjy ministrligine qaraidy) jumysy týraly eshteńe estilmeitinin de eskertip aitty.
"Qalai oilaisyz, ekonomikalyq tergeý qyzmeti qarjy ministrligi men basqa da ministrlikterden táýelsiz bolýy kerek emes pe?",- dep surady Nazarbaeva ulttyq ekonomika ministri Timýr Súleimenovten.
Súleimenov ekonomikalyq tergeý qyzmetine qarjy ministrliginiń qurylymynda jumys isteý tiimdirek ekenin aitty.
"Biz úkimet vedomstvolary arasynda ózara is-qimyldy ońailatý baǵytynda úlken jumys atqaryp jatyrmyz. Ekonomikalyq tergeý qyzmeti jumysynyń tiimdiliginde málimetter bazasy úlken ról oinaidy. Al málimetter bazasyn keden jáne salyq organdary toltyrady. Sondyqtan bul turǵydan tiimdirek jumys isteýge kómektesedi", — dep sendirdi ministr.
Al qarjy vitse-ministri Qanat Baedilov qarjy jáne monitoring komitetiniń quramynda derbes bólimshe qurý qarastyrylyp otyrǵanyn atap ótti. Ol Ózindik qaýipsizdik basqarmasy dep atalady.
"Ol tikelei ministrge baǵynady jáne barlyq komitettiń jumysynda jemqorlyq bolmaǵanyn qadaǵalaidy. Bul keleshekte óz jemisin beredi dep oilaimyn", — dedi Baedilov.
