- Batys Qazaqstanda dúniege kelip, Elordada erjetken Rio-de-Janeiro Olimpiadasynyń chempiony Daniiar Eleýsinov el táýelsizdigimen túidei qurdas sportshylardyń biri.
Osy 25 jylda ol Qazaqstannyń birneshe dúrkin chempiony, jastar arasyndaǵy álem chempionatynyń finalisi (Meksika, 2008 j.), Qazaqstan jastar oiynynyń chempiony (2009 j.), QR chempiony (2010 j.), Gýanchjoýdaǵy Aziia oiyndarynyń chempiony (2010 j.), olimpiadalyq kvalifikatsiialyq qurlyqaralyq týrnirdiń jeńimpazy (2012), QR-2012 Kýbogynyń jeńimpazy, (2016 j.) Rio Olimpiadasynyń «Altyn medal» iegeri atanyp úlgerdi.
Sporttaǵy eń iri jeńisine biyl Rioda ótken Olimpiada oiyndarynda qol jetkizdi. Bul onyń táýelsizdigimizdiń 25 jyldyq mereitoiyna jasaǵan eń úlken tartýy desek artyq aitqanymyz emes. Búgin saitymyzǵa suhbat bergen boksshy Eleýsinov táýelsizdiktiń qurdasy ekenine maqtanatynyn aityp, aǵynan aqtaryldy.
- Búgin táýelsizdik alǵanymyzǵa 25 jyl toldy. Táýelsizdiktiń qurdasy bul kúndi qalai qarsy alyp jatyr?
- Táýelsizdik kúni - elimizdiń eń ulyq merekesi. Eń áýeli jerlesterimdi osy merekemen quttyqtaimyn. Táýelsizdigimiz uzaǵynan bolyp, elimiz kórkeie bersin. El bolyp 25 jyldyǵymyzdy atap ótip jatyrmyz. Bul - úlken qýanysh. Men de elmen birge shattanyp, elmen birge qýanyp jatyrmyn. Qýanyshty kóppen birge bóliskenge ne jetsin.
- Táýelsizdiktiń qurdasy ári Olimpiada chempiony retinde kóptegen memlekettik is-sharalarǵa shaqyrtý alyp, jii qatysyp jatyrsyz. Bul siz úshin úlken maqtanysh bolar?
- Árine! Úlken maqtanysh. Sońǵy kezderi kóptegen iri memlekettik is-sharalarǵa qatystym. Sonyń ishinde Elbasy Nursultan Nazarbaev qatysqan birqatar sharalarda da boldym. Men úshin budan asqan qýanysh joq.
- Táýelsizdiktiń qurdasy ekenińizdi qanshalyq maqtan etesiz?
- Tilmen aityp jetkize almaityn shyǵarmyn. Biyl Olimpiada jyly el Táýelsizdiginiń 25 jyldyǵyna týra kelgeni men úshin úlken abyroi boldy. 25 jasymda 25 jyldyǵymyzǵa «Altyn» júlde syilaǵanymdy maqtan etemin. Eger osy táýelsizdigimiz bolmasa, bul deńgeige jete alarma edik, kim bilsin. Osynyń barlyǵy táýelsizdigimizdiń arqasy. Sondyqtan el táýelsizdik alyp jatqan qiyn-qystaý zamanda dúniege kelip, elmen birge eseigen, elmen birge eńsemdi tiktegen uldyń birimin. Sol úshin ózimdi árqashan baqytty sezinemin.
- Olimpiadaǵa attanarda Táýelsizdiktiń 25 jyldyǵy qarsańynda chempion bolam degen oi boldy ma?
- Men Olimpiadaǵa attanar aldynda aldyma eki túrli maqsat qoidym. Biri - 69 keli baiaǵydan qazaqtyń salmaǵy. Sózsiz bul dástúrdi buzbaý kerek dep oiladym. Ekinshisi - biyl el Táýelsizdiginiń 25 jyldyq mereitoiy. 25 jasymda 25 jyldyq merekemizge qalaida júlde syilaýym kerek degen maqsat qoidym. Degenime jettim. Endi eldiń yqylasyna bólenip jatyrmyn.
- Aiqai jiyrma bes jasyń máńgi jadyńda qalatyn bolar?
- Men 25 jasymda Olimpiadany baǵyndyrǵanym men Táýelsizdigimizdiń 25 jyldyǵyn atap ótkenimizdi máńgi esimnen shyǵarmaitynym anyq. Táýelsizdik toiy mereiimdi tipten asyryp jiberdi. Buryndary da kóptegen jarystarda álem, Aziia oiyndary siiaqty dodalarda top jardym. Ol kezderi de el-jurtym úlken qýanyshpen kútip alatyn. Biraq, Olimpiada shyńyn armandap júrgen edim. Bul biikti de biyl baǵyndyrdym. Bul meni burynǵydan da tanymal etti. Sonyń arqasynda el Táýelsizdiginiń 25 jyldyq mereitoilaryna arnaiy qonaq bolyp shaqyrylyp jatyrmyn.
- Olimpiada shyńyn baǵyndyrýǵa qansha jylyńdy arnadyń?
- Áli esimde, 2000 jyly Sidnei olimpiadasynda Bekzat Sattarhanov pen Ermahan Ybyraiymov aǵalarymyz chempion boldy. Men sol jyly es bilip qalǵan kezim edi. Kógildir ekrannan arqalaryna kók bairaǵymyzdy jamylyp, ring ishin ainalyp júgirgenin kórip, bolashaqta men de osyndai chempion bolam dep armandadym. Mine, bul arman 16 jyl degende áreń ustatty.
- Chempion bolǵan sátińiz esińizde me?
- Bári esimde. Ondai tarihi sát esimnen qalai ketsin. Tipti, jankúierlerimniń «Daniiar, Daniiar» degen aiǵaiy qulaǵymda áli de turǵandai bolyp seziledi.
- Endi qashan ringke oralasyz?
- Alla qalasa, jańa jyldan keiin oralamyn. Ózderińiz bilesizder, Olimpiada chempiondary men júldegerlerine ulttyq qurama biraz ýaqytqa demalys bergen. Biylǵy Qazaqstan birinshiligine de sol úshin qatysqan joqpyz. Endi jańa jyldan keiin jattyǵýǵa qaita kirisemiz.
.jpeg)