Kóp jaǵdaida para berýshiler qataryn jeke kompaniialardyń ókilderi bastap turady. Bul týraly QR Sybailas jemqorlyqqa qarsy is-qimyl agenttigi 1-shi departamentiniń asa mańyzdy ister jónindegi tergeýshisi Daniiar Biǵaidarov málim etti, dep habarlaidy QazAqparat.
Onyń sózine qaraǵanda, áleýmettik jaýapkershiliktiń jáne sybailas jemqorlyqtyń saldarynan qoǵamda bolyp jatqan zardaptardyń júgi aýyr. Onyń zardaby tek jemqordyń ózine tiip qoimai, sonymen birge onyń urpaǵyna, jaqyn týystaryna da qara kúie bolyp jaǵylady.
«Taldaý kórsetkendei, kóp jaǵdaida para berýshiler qataryn jeke kompaniialardyń ókilderi bastap turady. Olar laýazymdy tulǵalardy paraǵa satyp alý arqyly kásipkerlik qyzmetti qolaily iske asyrý (kedendik rásimderdi jeńildetý jáne jedeldetý, litsenziialar, sertifikattar, ruqsattar alý jáne t.b.), oryndalǵan jumystardyń aktilerine kedergisiz qol qoiý, memlekettik satyp alý sharttary boiynsha aqsha aýdarý máselelerin sheshedi. Kásipkerlerge para berer aldynda oilaný kerektigin eske salyp, eskertkim keledi. Sonyń saldarynan olar belgili bir qyzmetpen ainalysý quqyǵynan, litsenziialardan, sertifikattardan, ruqsattardan aiyrylýy jáne Memlekettik satyp alýǵa josyqsyz qatysýshylardyń tizilimine engizilýi múmkin», - dedi Daniiar Biǵaidarov.
Mundai jaǵdaida biznesmender tabys kózinen aiyrylyp qana qoimai, qyzmetkerlerin jumyssyz qaldyrady.
«Halyqaralyq tájiribede zańnamalyq deńgeide bekitilgen biznesti júrgizýdiń arnaiy standarttary men etikasy qoldanylady. Eger olar oryndalmasa, aram qoldy kásipkerlerge túrli sanktsiialar qoldanylady. Para berý siiaqty qylmys quramynyń qoǵamdyq qaýiptiligin para alýmen salystyrýǵa bolatyndyǵyn atap ótken jón. Iaǵni, «para berýshi de, para alýshy da – qylmysker ekeni haq». Sondyqtan mundai adamdardyń is-áreketteri para alýshynyń is-áreketinen kem emes qoǵamdyq qaýipke ie», - dedi agenttik ókili.
