QR Ulttyq bankiniń tóraǵasy Daniiar Aqyshev Halyqaralyq Ázerbaijan bankimen bolǵan mámilege qatyspaǵanyn málimdedi.
Bas bankir ol kezde Prezident ákimshiliginde jumys istegendikten, ol mámilege qatysýy múmkin bolmaǵanyn aitty.
«Baspasóz máslihatynda men osyǵan qatysty málimdeme jasaǵanmyn. Ol sheshimdi Ulttyq bankte sol ýaqytta istegen adamdar qabyldady. Men naqty kimder ekendigin aitpadym. Onymen tergeý oryndary ainalysýy kerek. Biraq, Kelimbetov myrza meniń bul mámilege qatysqanymdy tikelei aitqan bolsa, men 2014 jyldyń 28 tamyzynda Prezidenttiń ókimimen QR Prezidenti ákimshiliginiń áleýmettik-ekonomikalyq monitoring bóliminiń meńgerýshisi retinde taǵaiyndalǵanymdy atap ótkim keledi. Sáikesinshe, 2014 jyldyń qyrkúieginde Ulttyq bankte jumys istemegenime bailanysty eshqandai mámilege qatysýym múmkin emes. Sondyqtan, aqparat shyndyqqa janaspaidy. Sondai-aq, 2014 jyldyń naýryzynan men zeinetaqy aktivterin basqarýmen ainalysatyn bólimsheniń qyzmetimen ainalyspadym. Kelimbetov myrza muny biledi», - dedi D.Aqyshev.
Ol QR Ulttyq banki basqarmasy BJZQ investitsiialyq deklaratsiiasyn bekitkenin rastady. Onyń aitýynsha, mundaǵy málimetter jinaqtaýshy zeinetaqy qorlarynyń deklaratsisynan alynǵan.
«Shynynda da 2014 jyldyń mamyrynda QR Ulttyq bankiniń basqarmasy BJZQ investitsiialyq deklaratsiiasyn bekitti. BJZQ investitsiialyq deklaratsiiasy zeinetaqy aktivterin investistitsiialaýǵa arnalǵan birneshe quraldardan turady. Onda bylai dep jazylǵan: memlekettik qundy qaǵazdarǵa - 40 protsentten tómen, korporativti emitentterdiń obligatsiialary - pálen protsent, basqasy - pálen protsent dep kórsetilgen. Bul deklaratsiia BJZQ deklaratsiiasynan alynǵan. Ol ózgermegen. Biz onyń qabyldanýyna daýys berdik. Boldy! Naqty sheshimdi Ulttyq banktegi investitsiialyq komitet basshysy, nemese arnaiy departament basshysy qabyldaidy. Bul sonyń jaýapkershiligi», - dedi Aqyshev.
Aita ketý kerek, «Astana» halyqaralyq qarjy ortalyǵynyń basqarýshysy Qairat Kelimbetov QR Ulttyq bankiniń tóraǵasy Daniiar Aqyshevtyń jeke kompaniialarǵa zeinetaqy aktivterin basqarýdy berý týraly usynysyn «qaýipti» dep ataǵan bolatyn.
Bul týraly ol «Finansovaia svoboda» qoǵamdyq uiymynyń jýrnalisteri Bota Jumanova men saiasattanýshy Dosym Sátpaevqa suhbat bergen bolatyn.
Óz sózinde Kelimbetov Daniiar Aqyshevtiń de investitsiialyq deklaratsiiany maquldap daýys bergenin aitqan bolatyn.
