"Reseidiń arnaiy qyzmetimen bailanysy bar hakerleri Daniia qorǵanys ministrliginiń elektrondyq pochtalaryn buzyp, eki jyl boiy ańdý jasaǵan bolýy múmkin", - dep habarlady qorǵanys ministrligine silteme jasaǵan Berlingske basylymy.
Ministrlik kibershabýyldy "Fancy Bear" hakerler toby jasaǵanyn jáne onyń is-qimyly AQSh-tyń Demokratiialyq partiiasynyń serverlerine jasalǵan shabýyldarǵa uqsas ekenin aitady.
Daniianyń qorǵanys ministri Klaýs Hord Frederiksen hakerlerdiń Resei biliginiń ortalyq organdarymen jáne barlaý qyzmetimen "tikelei" bailanysta ekenin málimdedi. Biraq ol hakerlerdiń naqty qandai málimetterge ie bolǵanyn aitpady.
Daniianyń áskeri barlaý qyzmeti hakerlerdiń 2015-2016 jyldary alǵan aqparattary qupiia emesin, biraq kibershabýyldyń ózi eldiń aqparattyq qaýipsizdigine kádimgidei qaýip tóndiretinin habarlady. Vedomstvonyń málimetinshe, urlanǵan aqparattardy Resei agentterdi bopsalaý úshin paidalanýy múmkin.
Ózderin "Fancy Bear" dep ataityn hakerler tobynyń AQSh Demokratiialyq partiiasynyń, Germaniia parlamenti men Frantsiianyń TV5 telearnasynyń serverlerin buzyp kirýge qatysy bar. Bul top sonymen qatar ondaǵan elderdiń elshilikterine, Argentina, Túrkiia, Ońtústik Koreia, Ýkrainanyń qorǵanys ministrlikteri men NATO ókilderine de hakerlik shabýyl jasaǵan. Olar Resei biligimen bailanysy bar dep birneshe ret aiyptalǵanymen, Kreml aiypty joqqa shyǵarǵan.
Azattyq
