Búgin Ortalyq kommýnikatsiialar qyzmetindegi baspasóz máslihatynda Shyǵys Qazaqstan oblysy ákimi Danial Ahmetov óńirde indet juqtyrýdyń táýliktik deńgeii tómendep kele jatqanyn aitty, dep habarlaidy QazAqparat.
Onyń aitýynsha, qazirgi kezde Prezident tapsyrmasyn júzege asyrý boiynsha qajetti sharalar atqarylyp jatyr. Sondyqtan bul baǵyttaǵy jumystar táýlik boiy júrgizilýde. Qadaǵalaý maqsatynda kúnine birneshe márte shtab jiyny uiymdastyrylyp otyr.
Ákimniń sózine qaraǵanda, qazirgi kezde óńirde aýrýhana oryndaryn paidalaný deńgeii 17 paiyz shamasynda.
Baspasóz máslihatynda oblys ákimine eki apta ishinde koronavirýs boiynsha ahýaldy turaqtandyrý týraly berilgen tapsyrma jóninde suraq qoiyldy.
«Bul turǵyda qoiylǵan maqsat oryndalatynyna senimdimin. Biz táýlik boiy jumys istep jatyrmyz. Osy oraida keltirilgen derekter bizdiń dárigerler is-qimylynyń nátijelerine jáne aýdan ákimdikteri tarapynan atqarylyp jatqan jumystarǵa súiene otyryp málim boldy», - dedi D. Ahmetov.
Eske sala keteiik, qarasha aiynyń basynda Shyǵys Qazaqstan oblysy koronavirýstyń taralý qarqyny boiynsha «qyzyl aimaqqa» kirdi.
Osy oraida Vedomstvoaralyq komissiianyń otyrysynda Memleket basshysynyń tapsyrmasy aiasynda COVID-19 taralýyna jol bermeý jóninde birqatar sheshim qabyldady.
Shyǵys Qazaqstan, Soltústik Qazaqstan oblystarynyń ákimdikterine on kúndik merzimde «qyzyl aimaqtan» shyǵý úshin túbegeili sharalar qabyldaý tapsyryldy.
