QR Parlament Senatynyń depýtaty Dana Nurjigit karantin tártibin saqtaý ózińdi ǵana emes, ultty saqtaý degen pikirde, dep habarlaidy "Ult aqparat".
«Qymbatty otandastar, álemdi bir sátte tar qapasqa ainaldyrǵan indet jarty jylǵa jýyq ýaqyt ishinde, ókinishke qarai, árbir qazaqstandyq otbasyn ainalyp ótpedi desek - qatelespeimiz. Ata-anamyzdan, baýyrlarymyzdan, dos, tanys, áriptesterimizden qapyda aiyrylyp jptyrmyz. Kózge kórinbeitin, qubylyp baryp tutqiyldan shabatyn kesirli indet elimizdiń qanshama darynyn, darasyn aramyzdan julyp áketti.
«Jaý jaǵadan alǵanda, bóri etikten shalady» demekshi, tar jerde qoǵamnyń eski jaralary - jemqorlyq, alypsatarlyq siiaqty jiirkenishti faktorler áshkerelenip jatsa, ekinshi jaǵynan indetpen kúresip jatqan dárigerlerdiń jankeshtiligi, olarǵa kómekke kelgen eriktiler, jer-jerde qaiyrymdylyq jasap júrgen jandardyń qatary kóbeiip, adamgershilik pen otansúigishtiktiń eń biik úlgisine kýá bolyp jatyrmyz», - dedi QR Parlament senatynyń depýtaty Dana Nurjigit Instagram paraqshasyna jariialaǵan beinejazbada.
Onyń aitýynsha, bul kúres Qazaqstan qoǵamyn ózgertip jatyr.
«Ult retinde, qoǵam retinde synnan ótip, ortaq qasiretke qarsy turyp, beki tústik dep anyq aita alamyn. Bul kúres bizdiń ómir saltymyzdy ózgertti. Sol arqyly sanamyzdy ózgertip jatyr. Indet ult, memleket retinde saqtalyp, aman qalýdyń basty sharty - temirdei tártip ekenin sanamyzǵa turyp quiyp jatyr. Kez kelgen tártip qanmen jazylady. Ókinishke qarai, bul - aqiqat. Indet qurbandary osy sózime dálel. Karantin tártibin saqtaý ózińdi ǵana emes, ultty saqtaý ekenin umytpaiyq. Sabyr saqtap, toi, jiyndy toqtatyp, janazany da qazirgi jaǵdaiǵa sai ótkizip, indettiń órshýine jol bermeiik. Barlyǵyńyzǵa amandyq tileimin», - deidi ol.
