«Damý» kásipkerlikti damytý qory» AQ memlekettik organdar men ózara áreket etý departamentiniń direktory Gúlsaia Zainelǵabdina kásipkerlerge qanshalyqty jeńildetilgen nesie berilip jatqanyn aitty, dep habarlaidy QazAqparat.
«2020 jyldyń 1 naýryzyndaǵy jaǵdai boiynsha jeńildetilgen nesieler boiynsha ekinshi deńgeili bankter men mikroqarjylyq uiymdar, lizingti kompaniialarǵa 375 mlrd teńge bólindi. Sonymen qatar jeńildetilgen nesieleý baǵdarlamalary sheńberinde ekinshi deńgeili bankterden, mikroqarjylyq uiymdar men lizingti kompaniialar 39,9 mlrd teńge boiynsha 3 myń qaryz alýshynyń ótinimin maquldady. Osy jyldyń birinshi toqsany boiynsha «sýbsidiialaý» quraly boiynsha 692 joba maquldanyp, 60 mlrd teńge bólindi», - dedi Gúlsaia Zainelǵabdina OKQ-da onlain rejimde ótken baspasóz máslihatynda.
«Damý» qorynyń ókili eldegi óńdeý ónerkásibin qoldaý boiynsha baǵdarlama Ulttyq bank qory esebinen júrgizilip, túpki qaryz alýshy úshin 6 paiyzdyq mólsherlememen beriletinin jetkizdi.
«Sonymen qatar kásipkerler «Eńbek» memlekettik baǵdarlamasy sheńberinde 6 paiyzdyq jeńildetilgen stavkamen nesie ala alady. Áielderdiń kásipkerligin damytý maqsatynda shaǵyn jáne orta biznesti qoldaý boiynsha baǵdarlamalar Aziia banki men Eýropalyq qaita qurý jáne damý bankinen tartylǵan qarajat esebimen júzege asyrylady», - dedi ol.
Aita ketsek, buǵan deiin QR UEM kásipkerlikti damytý departamentiniń direktory Shyńǵys Ahmetov «Biznestiń jol kartasy – 2025» baǵdarlamasy men «Qarapaiym zattar ekonomikasy» baǵdarlamasy biznes ielerine memleket qandai qoldaý sharalaryn kórsetetinin aityp bergen edi.
