Jyldyq infliatsiianyń nysanaly dálizi 4-6 paiyz sheginde saqtalady. Bul týraly QR Parlamenti Májilisiniń jalpy otyrysynda QR Ulttyq ekonomika ministri Rýslan Dálenov málim etti, dep habarlaidy QazAqparat.
«2019 jylǵa arnalǵan respýblikalyq biýdjetti naqtylaý kezinde eldiń áleýmettik-ekonomikalyq damý boljamynyń negizgi kórsetkishteri saqtaldy. Bul jalpy ishki ónimniń 3,8 paiyz deńgeiinde ósýi, 89 mln tonna kóleminde munai óndirý eskerilgen. Munaidyń álemdik baǵasy joǵary qubylmalylyqty kórsetip otyr. Osyny eskere otyryp, munaidyń boljamdy baǵasy barreline 55 AQSh dollary deńgeiinde saqtaldy», - dedi ministr.
Onyń atap ótýinshe, jyldyq infliatsiianyń nysanaly dálizi 4-6 paiyz sheginde tur.
«Jalpy, respýblikalyq biýdjettiń kiristeri (transfertterdi esepke almaǵanda) 2019 jyly 7 trln 81 mlrd teńgeni quraidy. Túsimder túrleri boiynsha kirister qurylymy saqtalady. Kólemdi túsimderdi qosylǵan qun salyǵy (2,8 trln teńge), korporativtik tabys salyǵy (2 trln teńge), halyqaralyq saýdaǵa salynatyn salyqtar (1,5 trln teńge) qamtydy», - dedi Rýslan Dálenov.
Belgili bolǵandai, túsimderdiń jalpy kólemi 95 mlrd teńgege ósip, 10,7 trln teńgeni quramaq. Transfertterdiń túsimderi, onyń ishinde Ulttyq qordan transfertter óspeidi. Shyǵystar 95 mlrd. teńgege artady, bul kiristerdiń ósýimen sáikes keledi. Respýblikalyq biýdjet shyǵystarynyń kólemi 12 trln teńgeden asady.
