QR AShM Orman sharýashylyǵy jáne janýarlar álemi komitetiniń baspasóz hatshysy Sáken Dildahmet qyr qyzǵaldaqtaryn julmaýdy ótindi, dep habarlaidy "Ult aqparat".
«Bir qushaq qyzǵaldaqpen sýretke túsý úrdisi sáýir-mamyr ailarynda kúrt kóbeiedi. Biyl da mundai fotosýretter eselep kóbeiedi. Biraq, búgin qyzǵaldaqty nege julýǵa bolmaitynyn túsindirgimiz keledi. Jabaiy qyzǵaldaqtardyń ózge túrlerden aiyrmashylyǵy - olar piiazshyqtan emes, dán arqyly taralady. Tuqym topyraqta 4-7 jyl jatady jáne sodan keiin ǵana jańa piiazshyq qalyptasady. Bul piiazshyqtan gúl sabaǵy ósip shyǵady. Gúl kúltelengen soń tuqym qaýashaǵy paida bolady. Osy protsess jyl saiyn qaitalanady jáne bir qyzǵaldaqtyń ómiri 70-80 jylǵa jetedi. Al keide jetpeýi de múmkin. Sebebi, siz bir fotosýret úshin gúldi julyp alasyz da, 2 saǵattan keiin kúresinge tastaisyz. Sebebi, jabaiy qyzǵaldaq tez solady. Bul habardy barlyq dostaryńyz ben tanystaryńyzǵa taratyńyz», - dep jazdy Sáken Dildahmet Facebook-tegi paraqshasynda.
Aita keteiik, elimizdiń ońtústik óńirlerinde qyzǵaldaq gúli búr jardy. Qazaqstanda ósetin 35 túrli qyzǵaldaqtyń 18-i Qyzyl kitapqa engizilgen, olardyń taralý aimaǵy da qysqaryp barady.
