Bizge 45 millionǵa jýyq maska qajet. Bul týraly eldegi koronavirýstyq infektsiia boiynsha aǵymdaǵy jaǵdai jaily onlain brifingte aityldy, dep habarlaidy QazAqparat.
«Jyl basynda elimizde kúndelikti 200 myń maska tigip, ózimiz paidalanatynbyz. Maskanyń 80% óz elimizde tigiledi. Al arnaiy maskany shetelden alamyz. Epidemiianyń aldynda bizdiń memlekettegi farmatsevtikalyq zaýyttar kúndelikti 200 myń, aiyna 6 million dana maska shyǵaratyn jáne ol jetkilikti bolatyn» , - deidi QR Densaýlyq saqtaý ministri Eljan Birtanov.
Ol aqpan aiynda epidemiia bastalǵaly atalǵan zaýyttardyń múmkindigin keńeitý jumystary júrgizilgenin aitty.
«Ókinishke qarai, ol ońai bolǵan joq. Shikizattyń kóbi Qytaidan aldyrylatyn, al Qytai eksportty toqtatty. Basqa da memleketterdiń múmkindigin, ózimizdiń eldegi múmkindikti qarastyryp, kúnine 1 million dana túrli maska tigilýde. Bir aida elimizde 30 million maska tigilip, qajetti meditsinalyq mekeme, dárihanalarǵa taratyldy. Shynyn aitý kerek, meditsinalyq maska qajettiligi áli bar. Bizge 45 millionǵa jýyq maska kerek bolyp tur, demek maska tapshylyǵy bar. Maska tapshylyǵyn joiý úshin memleket tarapynan maska eksporttaý toqtatyldy. Ekinshiden, maska memlekettik komissiianyń sheshimimen taratylady. Aldymen meditsinalyq mekemelerge taratylady. Memleket basshysynyń tapsyrmasy boiynsha, keibir qajetti toptarǵa tegin beriledi. Bul jumystar Nur-Sultan, Almaty qalalarynda bastalyp ketti. Maskaǵa qatysty jaǵdai dúnie júzinde bar, sebebi buǵan eshkim daiyn bolǵan joq. Keibir adam dákeden maska tigý uiat ekenin aitady. Ol uialatyn jaǵdai emes, sebebi Qazaqstanda ǵana emes, basqa da memleketterde áskeri, meditsinalyq qyzmetkerler, túrmede otyrǵan azamattar, ártister bizdi qoldap, maska tigip jatyr. Ótken ǵasyrda ata-babalarymyz dákeden jasalǵan maska arqyly budan da qaýipti epidemiialardy toqtatqan. Dúnie júzinde osyndai qiyn jaǵdai bolǵan kezde barlyq múmkindikterdi paidalanýymyz kerek. Qajet bolsa osyndai marliden kóp ret paidalanýǵa bolatyn maska tigip, paidalanamyz. Maqsat – infektsiiany toqtatý» - deidi ol.
