Resei kúsh qurylymdary Siriiadaǵy "Islam memleketi" (IM) ekstremistik uiymynyń nusqaýy boiynsha Máskeýde jańa jyl merekesinde teraktiler jasamaq boldy degen kúdikpen jeti adamdy ustaǵanyn habarlady.
Federaldyq qaýipsizdik qyzmetiniń (FSB) málimdeýinshe, kúdiktiler Daǵystan territoriiasynda ustalǵan. FSB ustalǵandar "halyq kóp jinalatyn oryndarda atys qarýy men jarylǵysh zattardy qoldanyp" shabýyl jasamaq boldy" degen kúdikke ilingenin aitady.
Daǵystandaǵy islamshyl búlikshiler buǵan deiin politsiia men laýazymdy adamdarǵa shabýyldar jasaǵan. Olardyń keibiri IM-ge ant bergen.
Resei 2015 jyly qyrkúiekte Siriiaǵa osy el prezidenti Bashar Asadty qoldap áýe shabýyldaryn bastaǵan. Siriiadaǵy IM basshylary buǵan jaýap retinde Reseide terrorlyq shabýyldar jasaitynyn aityp doq kórsetken.
Máskeý biligi jańa jyl kezinde shabýyl qaýpinen adam kóp júretin oryndarda qaýipsizdik sharalaryn kúsheitýdi, onyń ishinde kólikpen shabýyl jasaý yqtimaldyǵyn eskerip qalaǵa júk kólikteriniń kirýine shekteý qoiýdy qarastyryp jatyr.
