رەسەي كٷش قۇرىلىمدارى سيريياداعى "يسلام مەملەكەتٸ" (يم) ەكسترەميستٸك ۇيىمىنىڭ نۇسقاۋى بويىنشا مەسكەۋدە جاڭا جىل مەرەكەسٸندە تەراكتٸلەر جاساماق بولدى دەگەن كٷدٸكپەن جەتٸ ادامدى ۇستاعانىن حابارلادى.
فەدەرالدىق قاۋٸپسٸزدٸك قىزمەتٸنٸڭ (فسب) مەلٸمدەۋٸنشە, كٷدٸكتٸلەر داعىستان تەرريتوريياسىندا ۇستالعان. فسب ۇستالعاندار "حالىق كٶپ جينالاتىن ورىنداردا اتىس قارۋى مەن جارىلعىش زاتتاردى قولدانىپ" شابۋىل جاساماق بولدى" دەگەن كٷدٸككە ٸلٸنگەنٸن ايتادى.
داعىستانداعى يسلامشىل بٷلٸكشٸلەر بۇعان دەيٸن پوليتسييا مەن لاۋازىمدى ادامدارعا شابۋىلدار جاساعان. ولاردىڭ كەيبٸرٸ يم-گە انت بەرگەن.
رەسەي 2015 جىلى قىركٷيەكتە سيريياعا وسى ەل پرەزيدەنتٸ باشار اسادتى قولداپ ەۋە شابۋىلدارىن باستاعان. سيريياداعى يم باسشىلارى بۇعان جاۋاپ رەتٸندە رەسەيدە تەررورلىق شابۋىلدار جاسايتىنىن ايتىپ دوق كٶرسەتكەن.
مەسكەۋ بيلٸگٸ جاڭا جىل كەزٸندە شابۋىل قاۋپٸنەن ادام كٶپ جٷرەتٸن ورىنداردا قاۋٸپسٸزدٸك شارالارىن كٷشەيتۋدٸ, ونىڭ ٸشٸندە كٶلٸكپەن شابۋىل جاساۋ ىقتيمالدىعىن ەسكەرٸپ قالاعا جٷك كٶلٸكتەرٸنٸڭ كٸرۋٸنە شەكتەۋ قويۋدى قاراستىرىپ جاتىر.
