Valiýta naryǵyndaǵy ahýal óte jyldam ózgerip jatyr. Bul týraly Ulttyq ekonomika birinshi vitse-ministri Timýr Jaqsylyqov málim etti, dep habarlaidy QazAqparat.
«Ahýal (naryqtaǵy) óte jyldam ózgerip jatyr jáne onyń barlyǵy qazirgi kezde biz yqpal ete almaityn syrtqy saiasi oqiǵalarǵa bailanysty. Biz tek oǵan áreket ete alamyz. Sondyqtan birinshi saýda-sattyq kezeńin kútip turmyz», - dedi T. Jaqsylyqov Májiliste tilshiler saýalyna jaýap bere otyryp.
Osy oraida ol daǵdarysqa qarsy jospar bar ekenin jáne osy baǵytta tiisti qadamdar jasalatynyn aitty.
«Ulttyq banktiń aqparaty jariialandy, bul turǵyda UB-nyń tiisti reglamenti bar. Saýda-sattyq kezinde baǵam kúrt aýytqysa, Ulttyq bankte saýdany toqtatý quqy bar. Sonymen qatar Ulttyq bank interventsiialyq tetikti paidalanatynyn jariialady», - dedi vitse-ministr.
Budan buryn habarlanǵandai, Timýr Jaqsylyqov aldaǵy ýaqytta valiýta baǵamy tepe-teńdik sipatyna deiin tómendeidi degen pikir aitqan edi.
Aita keteiik, Ulttyq bank «Qazaqstan qor birjasy» AQ-men birlesip teńge – AQSh dollary valiýta juby boiynsha saýda-sattyq reglamentin ózgertý týraly sheshim qabyldady. Atap aitqanda, 28 aqpanda saýda-sattyq Nur-Sultan qalasynyń ýaqyty boiynsha saǵat 15-00-de Frankfýrt aýktsiony formatynda ashylady.
«Bul sharalar ýaqytsha sipatqa ie, belgisizdiktiń joǵary dárejesin jáne syrtqy geosaiasi faktorlar tarapynan valiýta naryǵyna jáne el ishindegi qarjylyq turaqtylyqqa kórsetiletin qysymdy barynsha azaitý qajettiligin kórsetedi», - delingen habarlamada.
