QR Tsifrlyq damý, innovatsiia jáne aeroǵarysh ónerkásibi ministri Asqar Jumaǵaliev Memleket basshysy Qasym-Jomart Toqaevtyń málimdemesine orai pikir bildirdi, dep habarlaidy "Ult aqparat".
«IT-naryq el Prezidentiniń osynaý málimdemesin kútkenin bilemin jáne olar Memleket basshysy aitqan qoldaý sharalaryna qýandy. Áriptesterimniń nazaryn ásirese, myna eki basty máselege aýdarǵym keledi. Birinshi - eńbekaqy tóleý qorynan aýdarymdar men salyq tólemderinen bosatý túrinde salaǵa qarjylyq qoldaý kórsetý. Mundai qadam IT-kompaniialarǵa osynaý qiyn kezeńde joǵary sanatty mamandardy ustap qalýǵa, jumys isteýin jalǵastyryp, eldegi tsifrlandyrýdy ilgerletýge múmkindik beretindigine senimdimin»,- dep jazdy ministr Facebook paraqshasynda.
Onyń atap ótýinshe, ekinshiden, daǵdarysqa qarsy sharalardy júzege asyrý barysyna jergilikti shaǵyn jáne orta biznesti, onyń ishinde IT-oiynshylaryn tartý barynsha mańyzdy.
«Máselen, Memleket basshysy Úkimetke qazaqstandyq IT-kompaniialardy áleýmettik qoldaýǵa bólingen qarajattyń maqsatqa sai jumsalýyn monitoringileýdiń tiimdi tetikterin qamtamasyz etýge múmkindik beretin platforma ázirleýge tartýdy tapsyrdy. IT-mamandarymyzdy osynaý jumysqa belsendi túrde qosylýǵa shaqyramyn. Bul mańyzdy, degenmen, IT-kopaniialar ózderiniń laiyqty ekendikterin pash etýge múmkindik beretin bir ǵana keis emestigine senimdimin», - dedi Asqar Jumaǵaliev.
