Eldegi jumyspen qamtýdy jáne áleýmettik-ekonomikalyq turaqtylyqty qoldaýǵa baǵyttalǵan daǵdarysqa qarsy sharalardy júzege asyrý úshin Úkimet 5,9 trln teńge bóledi, dep habarlaidy QR Qarjy ministrligi.
Ministrliktiń habarlaýynsha, atalǵan qarjy respýblikalyq biýdjet esebinen (3,4 trln teńge) jáne biýdjetten tys qarajattan (2,5 trln teńge) quralady.
Shyǵyndar jumyspen qamtýdy arttyrýǵa, tabystan aiyrylý, áleýmettik járdemaqy syndy ai saiynǵy tólemderge, baspana qurylysyna, biýdjettiń salyq tabysy shyǵyndaryn toltyrýǵa jáne Memleket basshysynyń tapsyrmasymen basqa da baǵyttarǵa jumsalady.
«Atap aitqanda, Jumyspen qamtýdyń jol kartasyn qarjylandyrýǵa 1 trln teńge bólinedi, onyń 300 mlrd teńgesi respýblikalyq biýdjetten alynsa, 700 mlrd teńge - biýdjetten tys qarajat. Osy qarjy aiasynda óńirlerde infraqurylymdyq jobalar júzege asyrylyp, 255 myń jumys orny ashylady. Biznes sýbektileriniń ainalym kapitalyna 8% jeńildetilgen nesie berý jáne «Qarapaiym zattar ekonomikasy» baǵdarlamasy boiynsha investitsiialyq jobalarǵa jyldyq 6 paiyzben jeńildetilgen nesielerdi keńeitý aiasynda 1 trln teńge (biýdjetten tys) qarastyrylǵan», - delingen ministrlik habarlamasynda.
Eki ai ishinde 4,5 millionnan astam adam tabysyn joǵaltqany úshin eń tómengi jalaqy (42,5 myń teńge) mólsherinde tólem alady. Bul úshin shamamen 370 milliard teńge (Memlekettik áleýmettik saqtandyrý qorynan) qarastyrylǵan.
«Eldegi turǵyn úi qurylysy kólemin 15 million sharshy metrge jetkizý úshin baspana qurylysyna qosymsha 390 milliard teńge bólinedi (biýdjetten tys qarajat). Respýblikalyq biýdjettiń salyqtyq kiristeri shyǵynyn óteý úshin jáne memlekettiń barlyq áleýmettik mindettemelerin oryndaý úshin 1,7 trln bólindi. Ekonomikanyń zardap shekken salalaryndaǵy shaǵyn jáne orta biznes pen iri kásipkerlik sýbektileri úshin jalaqy tóleý qoryn salyqtar men alymdardan bosatýǵa bailanysty jergilikti biýdjetterdiń shyǵynyn óteý úshin 237 mlrd teńge qarastyrylǵan», - dep málimdedi ministrlik.
313 mlrd teńge áleýmettik tólemderdi (zeinetaqy, járdemaqy, ataýly áleýmettik kómek) 10% deiin qosymsha indeksatsiialaýǵa, shákirtaqyny kóbeitýge jáne kommýnaldyq tólemder úshin halyq tólemderin óteýge jumsalady.
«Memlekettik baǵdarlamalardy keńeitýge 240 milliard teńge qarastyrylǵan, onyń ishinde: agroónerkásip keshenin sýbsidiialaýǵa - 50 mlrd teńge; «Eńbek» memlekettik baǵdarlamasy aiasynda eńbek naryǵyn damytýǵa - 50 mlrd teńge; «Biznestiń jol kartasy - 2025» memlekettik baǵdarlamasy boiynsha syiaqy mólsherlemelerin sýbsidiialaý jáne qaryzdarǵa kepildik berý úshin - 84,5 mlrd teńge; «Aýyl - El besigi» jobasy aiasynda aýyldyq jerlerdegi áleýmettik jáne injenerlik infraqurylymdy damytýǵa - 55 mlrd teńge», - dep habarlady Qarjy ministrligi.
Epidemiiaǵa qarsy sharalarǵa, onyń ishinde meditsinalyq jáne basqa jumysshylarǵa ústemeaqy tóleýge, halyqtyń osal toptaryn azyq-túlikpen jáne turmystyq jiyntyqpen qamtamasyz etýge jáne basqa da jumystarǵa 125 mlrd teńge qarastyrylǵan.
Sonymen birge, azamattar men ekonomikany qoldaýǵa, onyń ishinde Memleket basshysynyń tapsyrmalaryn oryndaýǵa qosymsha 575 mlrd teńge baǵyttalǵan. Atalǵan qarajat aiasynda valiýta baǵamynyń ósýine, Nur-Sultan qalasynda úlestik qurylystyń problemalyq nysandaryn aiaqtaýǵa jáne basqa da basym mindetterge bailanysty biýdjet shyǵyndary aldyn ala eskerilgen.
