Almaty qalasynyń №32 qalalyq emhanasynyń bas dárigeri Artýr Qajybaev óńirlik kommýnkatsiialar qyzmetinde ótken onlain brifingide megapolistegi kúrdeli epidemiialyq jaǵdai aiasynda qala turǵyndaryna birqatar usynystar aitty, dep habarlaidy QazAqparat.
«Birinshiden, betperde kiip, adamdar kóp jinalatyn oryndarǵa barmaý, qolǵa qolǵap kiiý mindetti. Úige kelgennen keiin qoldy jýý kerek. Adamdarmen kezdesken kezde 1,5-2 metr qashyqtyqty saqtaý qajet. Bastysy adamdar kóp toptasyp jinalatyn jerlerge barmaý kerek», - dedi ol.
Artýr Qajybaev sonymen birge, qolǵap pen betperdeni ásirese qoǵamdyq kólikte kiiýdiń mańyzdylyǵyn túsindirdi.
«Qolǵap kiiý óte mańyzdy, óitkeni eger qolǵapsyz qolymyzda infektsiia bolsa, biz ony baiqamaimyz jáne avtomatty túrde betimizdi qolmen ustaimyz. Sóitip biz tez juqtyrýymyz múmkin. Qazirgi ýaqytta betperdeler eń mańyzdy saqtyq sharalarynyń biri bolyp tabylady, adamdar bir - birimen sóilesken kezde infektsiia aýa arqyly taralady, sondyqtan qala turǵyndaryna betperde men qolǵap kigen durys dep oilaimyn», - dedi bas dáriger.
Esterińizge sala keteiik, Almatyda juqtyrý oryndary týraly aqparatqa sáikes, kóbinese adamdardyń 39,6%-y qoǵamdyq oryndarǵa baryp juqtyrǵan, 27,5%-y-otbasynda KVI-men aýyratyn naýqaspen qarym-qatynas jasaǵan, 20,3%-y qoǵamdyq kólikte juqtyrǵan.
«Juqtyrý sebepterine keletin bolsaq, eń bastysy naýqastar naýqas adamdarmen qarym - qatynasta boldy. Ekinshiden, adamdar kóp jinalatyn jerlerde bolǵandar jáne qonaq shaqyryp, qonaqqa, mysaly toiǵa barǵandar. Odan keiin azyq-túlik dúkenderinen - 36%, qoǵamdyq kólikterden - 13%, bazarlardan juqtyrǵandar sany -12%. Bul bizdiń emhanada baqylaýǵa alynǵan 23 adamnyń juqtyrý oqiǵalary boiynsha statistika. Kóbinese juqtyrý jaǵdailary aldyn alý sharalaryn eskermeýmen bailanysty», - dedi ol.
Spiker sondai-aq mobildi brigadany qandai jaǵdailarda dereý shaqyrý kerek degen suraqqa jaýap berdi.
«Eger JRVI belgileri - jótel, dene qyzýy paida bolsa, onda emdelýshige emhanaǵa júginý - tirkeý bólimine qońyraý shalý qajet. Tirkeý ornynda mobildi brigadaǵa aýystyrady, mobildi brigada kelip, qyzmet kórsetedi. Eń aldymen olar (mobildi brigada) da qońyraý shalyp, jaǵdaiyna baǵa berip, sodan keiin kelip kómek kórsetedi. Mobildi brigada kelip, qarap, aýrýhanaǵa jatqyzý qajet degen belgilerdi kórse, naýqas aýrýhanaǵa jatqyzylady. Bul kezde naýqas 14 kún boiy baqylaýda bolady», - dep túsindirdi Artýr Qajybaev.
