Ortalyq Eýropa elderi koronavirýs pandemiiasynyń ekinshi tolqyny aiasynda epidemiialyq jaǵdaidyń nasharlaýyna bailanysty jańa shekteýler engizip jatyr, dep habarlaidy "Ult aqparat" Euronews-ke silteme jasap.
Sloveniiada el azamattaryna on kún boiy óz aýdandary men qalalarynan shyǵýǵa tyiym salyndy. COVID-19-ǵa qatysty ahýal shielenisken jaǵdaida ol uzartylýy múmkin. Sondai-aq, el biligi barlyq shuǵyl emes meditsinalyq kómek kórsetýdi eki aptaǵa toqtatty. Sonymen qatar, senbiden bastap barlyq meiramhana, sulýlyq salony men turmystyq qajettilikke jatpaityn taýarlardy satatyn dúkender jabylyp, mektepter qashyqtan oqytýǵa kóshedi.
Chehiia Respýblikasynyń biligi taǵy da sheteldikterdiń elge kirýin toqtatyp, barlyq adamnyń el ishinde erkin júrýin shekteý qoidy. Bul bir apta ishinde koronavirýs juqtyrýdyń jańa jaǵdailarynyń sany elde rekordtyq deńgeige, 15 myńǵa jetkennen keiin qabyldanǵan sheshim bolatyn. Sársenbiden bastap Chehiiada saǵat 9-dan tańǵy 5-ke deiin komendanttyq saǵat engiziledi. Tek jumys isteitinder men meditsinalyq kómek kórsetý úshin erekshe jaǵdailar qarastyrylǵan.
Slovakiia biligi koronavirýsqa jalpyulttyq testileý júrgiziletinin habarlady. Eldiń barlyq halqy, shamamen 5,5 millionǵa jýyq adam osy demalys kúnderi tekserilmek. Buǵan deiin Slovakiia premer-ministri aýrýdy eń kóp juqtyrǵan aýdandarda aldyn-ala testileý sátti ótkenin málimdedi.
Sondai-aq, Majarstanda ólim kórsetkishiniń jańa rekordy tirkeldi. Seisenbi kúngi tańerteńgi jaǵdai boiynsha bir táýlikte 63 adam koronavirýstan kóz jumǵan. Olardyń basym kópshiligi egde jastaǵy adamdar men sozylmaly aýrýlary bar patsientter. Osylaisha koronavirýstan bolǵan ólim kórsetkishiniń sany 1535 adamǵa jetti. Elde jalpy COVID-19 juqtyrýdyń 63 myńnan astam jaǵdaiy tirkelgen.
