Pavlodarda Covid-19-ǵa qarsy jedel shtabtyń otyrysy ótti, dep habarlaidy Pavlodarnews.kz.
Oblystyq sanitarlyq-epidemiologiialyq baqylaý departamentiniń basshysy Batyrbek Áliev 25 qańtardaǵy jaǵdai boiynsha óńirde 15 qala men aýdannyń 12-si «qyzyl aimaqta» ekenin atap ótti. Jalǵyz Baianaýyl aýdany - «sary aimaqta». Sondai-aq oblystaǵy 40 aýyl - «qyzyl aimaqta» tur.
«27 qańtardaǵy jaǵdai boiynsha oblysta koronavirýstyń rastalǵan 12328 jaǵdaiy anyqtaldy. Sońǵy 2 aptadaǵy jaǵdaidy alyp qarasaq, 11-17 qańtar arylyǵynda 616 jaǵdai, 18-24 qańtar aralyǵynda 1339 jaǵdai tirkelgen. Osy jaǵdai qazirgi karantindik shekteý sharalaryn saqtaýdy jáne erejelerdi ustanýdy qatań baqylaýdy talap etedi. Ótken táýlikte 219 KVI jaǵdaiy anyqtaldy», - dedi Batyrbek Áliev.
Batyrbek Álievtiń aitýynsha, oblysta 2020 jyldyń naýryz-jeltoqsan ailarynda óndiristik kásiporyndarda 803 KVI jaǵdaiy tirkelgen. 1 qańtardan beri 248 jaǵdai anyqtaldy. «KAZ Minerals Bozshakol» JShS, «Qazhrom» TUQ» AQ jáne «ERG Service» JShS kóp anyqtalǵan.
«Kásiporyndarda 48 jospardan tys tekserý júrgizildi. Anyqtalǵan ereje buzýshylyqtarǵa bailanysty jalpy somasy 5 million 500 myń teńgege 14 ákimshilik aiyppul taǵaiyndaldy», - dedi departament basshysy.
Oblys ákimi Ábilqaiyr Sqaqov qalalar men aýdandardyń jáne kásiporyndardyń basshylyǵyna shekteý sharalaryn kúsheitýdi jáne olardyń saqtalýyn baqylaýdy tapsyrdy.
«Aptalyq kórsetkishterge qaraǵanda Ekibastuz, Aqsý qalalarynda jáne Ertis, Jelezin, Mai aýdandarynda ósý baiqalady. Al, Sharbaqty, Ýspen, Pavlodar aýdandarynda tómendeý bar. Ishki jaǵdaimen qatar, memlekettik shekaraǵa jaqyn aýdandarda qozǵalysty baqylaý qajet. Jol boiyndaǵy qyzmet kórsetý oryndarynda talaptardy saqtap, dezinfektsiialyq jumystardyń turaqty júrgizilýin qadaǵalaý kerek. Ekibastuz qalasynyń jaǵdaidy turaqtyndyrý boiynsha tájiribesi bar. Qazir de sol tájiribeni qoldaný qajet», - dedi oblys ákimi.
Aita keteiik, osy ýaqytqa deiin Pavlodar oblysynda 12328 adam KVI juqtyrǵan. 10793 adam indetten jazylyp shyqty. 99 adam kóz jumdy.
Eske salsaq, 28 qańtardaǵy epidemiologiialyq ahýaldy baǵalaý matritsasy boiynsha Qazaqstannyń 6 oblysy men 2 qalasy áli de «qyzyl» aimaqta tur. Olar: Aqmola, Pavlodar, Atyraý, Qostanai, Soltústik Qazaqstan, Batys Qazaqstan oblystary men Nur-Sultan jáne Almaty qalalary.
