QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda epidemiiaǵa qarsy sharalardy iske asyrý barysy qaraldy. Qazaqstanda koronavirýs infektsiiasynyń taralýy boiynsha aǵymdaǵy jaǵdai týraly QR densaýlyq saqtaý ministri Aleksei Tsoi baiandady, dep habarlaidy "Ult aqparat" primeminister.kz saityna silteme jasap.
3 tamyzdaǵy jaǵdai boiynsha Qazaqstanda 93 820 naýqas tirkelgen, onyń ishinde 27 597 adam em alýda. 65 132 (69,4 %) adam emdelip shyqsa, 1091 adam kóz jumǵan. Jalpy, elimiz boiynsha ótken aptadaǵy kórsetkishpen salystyrǵanda, aýrý juqtyrǵandardyń tirkelýiniń 18%-ǵa tómendegeni baiqalady.
«Karantinniń 4 aptasynda tósekterdiń bos bolmaýy 56%-ǵa, onyń ishinde reanimatsiialyq tósek oryndarynyń bos bolmaýy 36%-ǵa tómendegeni baiqalady. Saýyqqandar sany 69,4%-ǵa deiin ósti. Jedel járdemdi shaqyrýlar, onyń ishinde koronavirýs boiynsha shaqyrýlar sany 40%-ǵa tómendedi. Infektsiianyń reprodýktivtilik kórsetkishi 24%-ǵa, iaǵni 1,2-den 0,89-ǵa deiin tómendedi. Osylaisha, densaýlyq saqtaý júiesine júktemeniń negizgi kórsetkishterin tómendetýge qol jetkizildi», — dedi A. Tsoi.
Onyń aitýynsha, infektsiianyń reprodýktivtilik kórsetkishiniń dinamikasy (bir naýqas aýrýdy juqtyrǵan adamdar sany) koronavirýs infektsiiasynyń rastalǵan jaǵdailaryn tirkeý negizinde esepteledi. Bireýden kóp kórsetkish juqtyrǵan patsientterdiń ósý tendentsiiasyn kórsetedi. Virýstyń reprodýktsiiasynyń bireýden tómen bolýy aýrýdy juqtyrǵan bir adamnan juqtyratyn adamdar sanynyń azaiǵanyn kórsetedi.
«Qatań shekteý sharalaryn engizgenge deiin reprodýktsiia kórsetkishi 1,2 qurady. Karantin engizilgennen keiin eki aptadan keiin biz reprodýktsiia kórsetkishiniń turaqty tómendeý tendentsiiasyn baiqap otyrmyz. Keiinge qaldyrylǵan oń dinamika infektsiianyń 14 kúnge sozylatyn inkýbatsiialyq kezeńine bailanysty», — dedi ministr.
23 shildeden bastap infektsiianyń kóbeiý kórsetkishiniń turaqty tómendeý úrdisi baiqalady jáne 4 tamyzdaǵy jaǵdai boiynsha bul kórsetkish 0,89 deńgeige deiin tómendedi. Bul engizilgen karantinniń jáne jaǵdaidy turaqtandyrý boiynsha barlyq jerde qabyldanǵan sharalardyń tiimdiligin taǵy da rastaidy. Epidemiologiialyq turǵydan alǵanda, bul kórsetkishtiń bireýden tómen bolýy mańyzdy.
A. Tsoi atap ótkendei, 4 tamyzdaǵy jaǵdai boiynsha Aqmola, Qostanai oblystarynan basqa barlyq óńirlerde reprodýktivtilik kórsetkishiniń kórinisi birlikten joǵary emes betburys deńgeiine jetti.
«Statistikany esepke alý tásilderiniń ózgerýine bailanysty 1 tamyzdan bastap Densaýlyq saqtaý ministrligi tamyzdyń alǵashqy on kúnindegi derekter negizinde reprodýktsiia kórsetkishine qaita esepteý júrgizedi. Óńirlerdegi jaǵdaidy odan ári baǵalaý jalǵasady», — dedi A. Tsoi.
Ministrdiń aitýynsha, maska kiiý talaby árbir qazaqstandyqqa qatysty. Ministrlik maska kiiý tiimdiliginiń halyqaralyq tájiribesine taldaý júrgizdi. Sonymen, 1 aidan keiin maska rejiminiń mýltiplikativti áseri virýstyń kóbeiý áserin 4 esege deiin tómendetedi.
«Buryn habarlaǵanymyzdai, eger maska kigen adamnyń aýrýdy juqtyrý yqtimaldyǵy 30%-ǵa az bolsa, bul bir aidan keiin juqtyrǵan adamdardyń sanyna sáikesinshe 300-den 85-ke deiin azaiýyna áser etedi. Áleýmettik qashyqtyqty saqtaýmen qosa alǵanda, mýltiplikativti áser aiyna 1 adamǵa deiin ǵana juqtyrý deńgeiine jetedi», — dedi densaýlyq saqtaý ministri.
A. Tsoi sonymen qatar maska taǵý boiynsha sanitarlyq-epidemiiaǵa qarsy jáne sanitarlyq-profilaktikalyq is-sharalardy uiymdastyrý jáne ótkizý týraly buiryqqa engizilgen ózgeristerge toqtaldy
«Maskany qoǵamdyq oryndarda, halyqtyń kelýine, olarǵa qyzmet kórsetýge jáne demalýyna arnalǵan úi-jailarda; qoǵamdyq kólikte; ashyq aýada qoǵamdyq oryndarda kiiý mindetti. Mynadai sanattardy qospaǵanda: bes jasqa deiingi balalar; áleýmettik ara qashyqtyqty saqtaǵan jaǵdaida jeke, 5 adamnan aspaityn toptyq sportpen shuǵyldaný kezinde; jáne meditsinalyq qarsy kórsetilimderi bar adamdar. Sondai-aq, qoǵamdyq tamaqtaný oryndarynda ashyq aýada áleýmettik ara qashyqtyqty saqtai otyryp maskasyz júrýge bolady», — dedi vedomstvo basshysy.
A. Tsoi atap ótkendei, maska kiiý qoǵamda paidaly ádetke ainalýy tiis. Ókinishke orai, bul búgingi kúni asa ýaqytsha qajettilik. Maska rejimin mindetti túrde qamtamasyz etý aýrýdyń taralý qarqynyn tómendetý úshin qosymsha faktor bolady, óitkeni turǵyndar arasynda infektsiianyń taralýyn qysqartady.
«Sanitarlyq talaptardyń kúsheiýiniń arqasynda sońǵy tórt aptada barlyq óńirlerde halyqtyń aýrýǵa shaldyǵýy aitarlyqtai tómendegeni baiqalatynyna nazar aýdarǵym keledi. Ortasha eseppen alǵanda, el boiynsha aýrýdy juqtyrýdyń táýliktik ósimi bir jarym esege jýyq tómendedi», — dep túiindedi densaýlyq saqtaý ministri.
