4–14 maýsym aralyǵynda Qazaqstanda álemge áigili Cirque du Soleil ujymynyń OVO shoýy ótedi, dep habarlaidy ult.kz.
4–7 maýsym kúnderi qoiylym Astanadaǵy Barys Arenada ótse, 11–14 maýsym aralyǵynda Almaty qalasyndaǵy Almaty Arena-da ótpek.
Premera qarsańynda ult.kz tilshisi sahna syrtynda bolyp, ártisterdiń shoýǵa daiyndyǵymen tanysyp qaitty.
Foto: Cirque du Soleil baspasóz qyzmetinen
Portýgal tilindegi OVO sózi «jumyrtqa» dep aýdarylady. Cirque du Soleil bul ataýdy ómirdiń paida bolýy men jańǵyrýdyń belgisi retinde tańdaǵan. 2009 jyly tusaýy kesilgen qoiylym arada 17 jyl ótse de kórermen qyzyǵýshylyǵyn joǵaltpai, álemniń 47 elinde 10 millionnan astam kórermen tamashalaǵan.
«Uzaq tarihy bar shoý únemi damyp, jańaryp otyrady. Shamamen bir jarym jyl buryn biz sahna men dekoratsiialardy tolyqtai ózgerttik, úsh jańa akrobatikalyq nómir qostyq, jańa keiipkerler men kostiýmder engizdik, mýzykany jáne kloýndyq kórinisterdi jańarttyq. Iaǵni kórermender burynǵydai áserli jándikter álemin tamashalaidy, biraq bul joly shoýdyń múlde jańartylǵan nusqasyn kóredi», – deidi Tsirktiń resmi ókili Jani Mallen.
Foto: Cirque du Soleil baspasóz qyzmetinen
OVO qoiylymynda jalpy sany 14 shoý usynylyp, 53 ártis óner kórsetedi. Cirque du Soleil-diń ereksheligi baǵdarlamasynda janýarlar joq. Janýarlardyń beinesin ártister somdaidy.
Jani Malleniń aitýynsha, biyl OVO shoýy tek Qazaqstanda ǵana kórsetiledi.
Eske salsaq, 2017 jyly Cirque du Soleil Astanaǵa EXPO halyqaralyq kórmesiniń ashylýyna kelgen. Biraq ol kezde trýppa tolyqqandy shoý kórsetpegen.
OVO shoýynyń basty erekshelikteriniń biri – biiktigi 9 metr, eni 19,5 metr bolatyn alyp qabyrǵa. Akrobattar onyń boiymen tóńkerilip qozǵalyp, kúrdeli triýkter oryndaidy. Qabyrǵadaǵy 13 alyp japyraq qoiylym barysynda qozǵalyp, sahnaǵa erekshe kórik beredi.
Foto: Cirque du Soleil baspasóz qyzmetinen
Sonymen qatar kórermender birneshe metrlik alyp gúlder men jándikter álemin beineleitin erekshe dekoratsiialardy tamashalai alady. Barlyq sahnalyq qurylymdar ár qalada qaita qurastyrylyp, olardy ornatýǵa halyqaralyq jáne jergilikti mamandar qatysady.
OVO shoýynda bir qoiylymǵa shamamen 800 kostiým paidalanylady. Barlyq kiimder Monrealda arnaiy tigilip, ár ártiske jeke beiimdeledi.
Foto: Cirque du Soleil baspasóz qyzmetinen
Kostiýmderdi kútip-baptaýmen arnaiy mamandar ainalysady, al tsirk ózimen birge kir jýǵysh jáne keptirgish mashinalardy da alyp júredi.
«Biz ózimizben birge bes kir jýǵysh jáne úsh keptirgish mashinany alyp júremiz. Keshe olar búgingi shoýǵa daiyndalý úshin 60 ret kir jýdy. Ár qoiylymnan keiin taǵy 12–15 júkteme tek kostiýmderdi jýýǵa ketedi», – deidi Tsirktiń resmi ókili.
Foto: Cirque du Soleil baspasóz qyzmetinen
Shoýǵa arnalǵan mýzykany braziliialyq kompozitor Berna Seppas jazǵan. Kompozitsiialarda jándikterdiń shynaiy dybystary qoldanylǵan. Sahnada jeti mýzykant pen vokalist jandy daýysta óner kórsetedi, al mýzyka qoiylym barysyna qarai ózgerip otyrady.
OVO belgili bir elge beiimdelmeidi. Ártister keide sóilegenimen, olar kórermendermen «jándikter tilinde» tildesedi.
Akrobattar Artýr Dýdov pen Esmira Kýlieva erli-zaiypty. Olar Cirque du Soleil-ge qosylǵandaryna úsh ai ǵana bolǵan. Degenmen osy salada ár túrli ujymdarda óner kórsetip júrgenderine uzaq ýaqyt bolǵan.
Foto: Cirque du Soleil baspasóz qyzmetinen
«Bizdiń nómirde úzilissiz oryndalatyn kóptegen kúrdeli elementter men aýysýlar bar. Men beldikke jalań qolmen órmelep, tek óz kúshimniń arqasynda ilinip turamyn. Eń qiyn bóligi – sońǵy kombinatsiia. Onda shpagatqa otyryp, tepe-teńdikti saqtaýym kerek», – deidi Esmira Kýlieva.
Onyń aitýynsha, Cirque du Soleil qaýipsizdik máselesine erekshe mán beredi. Sondyqtan ártisterdiń kóterilý biiktigine arnaiy shekteý qoiylǵan. Ol shamamen 8–10 metrdi quraidy.
Ártister kúrdeli triýkter arqyly keiipkerlerdiń minezin barynsha ashyp, kórermenderdi jándikterdiń tańǵajaiyp álemine jeteleýge tyrysatynyn aitty.
Foto: Cirque du Soleil baspasóz qyzmetinen
«Bizge Astana boiynsha ekskýrsiia uiymdastyrdy. Qala maǵan birden unady, munda alǵash ret kelip turmyn. Astana shaǵyn Dýbai siiaqty áser qaldyrdy: bári zamanaýi ári tehnologiialyq damyǵan. Bizdi jasandy intellekt mýzeiine apardy, túrli kórmelerdi, teatrlar men operany kórsetti. Baǵdarlama óte mazmundy boldy», – dedi Dýdov.
Ártister qoiylym ótetin arenanyń tehnikalyq múmkindikterin joǵary baǵalap, «álemdik deńgeidegi arena» dep atady.
