4–14 ماۋسىم ارالىعىندا قازاقستاندا ەلەمگە ەيگٸلٸ Cirque du Soleil ۇجىمىنىڭ OVO شوۋى ٶتەدٸ, دەپ حابارلايدى ult.kz.
4–7 ماۋسىم كٷندەرٸ قويىلىم استاناداعى بارىس ارەنادا ٶتسە, 11–14 ماۋسىم ارالىعىندا الماتى قالاسىنداعى Almaty Arena-دا ٶتپەك.
پرەمەرا قارساڭىندا ult.kz تٸلشٸسٸ ساحنا سىرتىندا بولىپ, ەرتٸستەردٸڭ شوۋعا دايىندىعىمەن تانىسىپ قايتتى.
فوتو: Cirque du Soleil باسپاسٶز قىزمەتٸنەن
پورتۋگال تٸلٸندەگٸ OVO سٶزٸ «جۇمىرتقا» دەپ اۋدارىلادى. Cirque du Soleil بۇل اتاۋدى ٶمٸردٸڭ پايدا بولۋى مەن جاڭعىرۋدىڭ بەلگٸسٸ رەتٸندە تاڭداعان. 2009 جىلى تۇساۋى كەسٸلگەن قويىلىم ارادا 17 جىل ٶتسە دە كٶرەرمەن قىزىعۋشىلىعىن جوعالتپاي, ەلەمنٸڭ 47 ەلٸندە 10 ميلليوننان استام كٶرەرمەن تاماشالاعان.
«ۇزاق تاريحى بار شوۋ ٷنەمٸ دامىپ, جاڭارىپ وتىرادى. شامامەن بٸر جارىم جىل بۇرىن بٸز ساحنا مەن دەكوراتسييالاردى تولىقتاي ٶزگەرتتٸك, ٷش جاڭا اكروباتيكالىق نٶمٸر قوستىق, جاڭا كەيٸپكەرلەر مەن كوستيۋمدەر ەنگٸزدٸك, مۋزىكانى جەنە كلوۋندىق كٶرٸنٸستەردٸ جاڭارتتىق. ياعني كٶرەرمەندەر بۇرىنعىداي ەسەرلٸ جەندٸكتەر ەلەمٸن تاماشالايدى, بٸراق بۇل جولى شوۋدىڭ مٷلدە جاڭارتىلعان نۇسقاسىن كٶرەدٸ», – دەيدٸ تسيركتٸڭ رەسمي ٶكٸلٸ جاني ماللەن.
فوتو: Cirque du Soleil باسپاسٶز قىزمەتٸنەن
OVO قويىلىمىندا جالپى سانى 14 شوۋ ۇسىنىلىپ, 53 ەرتٸس ٶنەر كٶرسەتەدٸ. Cirque du Soleil-دٸڭ ەرەكشەلٸگٸ باعدارلاماسىندا جانۋارلار جوق. جانۋارلاردىڭ بەينەسٸن ەرتٸستەر سومدايدى.
جاني ماللەنٸڭ ايتۋىنشا, بيىل OVO شوۋى تەك قازاقستاندا عانا كٶرسەتٸلەدٸ.
ەسكە سالساق, 2017 جىلى Cirque du Soleil استاناعا EXPO حالىقارالىق كٶرمەسٸنٸڭ اشىلۋىنا كەلگەن. بٸراق ول كەزدە ترۋپپا تولىققاندى شوۋ كٶرسەتپەگەن.
OVO شوۋىنىڭ باستى ەرەكشەلٸكتەرٸنٸڭ بٸرٸ – بيٸكتٸگٸ 9 مەتر, ەنٸ 19,5 مەتر بولاتىن الىپ قابىرعا. اكروباتتار ونىڭ بويىمەن تٶڭكەرٸلٸپ قوزعالىپ, كٷردەلٸ تريۋكتەر ورىندايدى. قابىرعاداعى 13 الىپ جاپىراق قويىلىم بارىسىندا قوزعالىپ, ساحناعا ەرەكشە كٶرٸك بەرەدٸ.
فوتو: Cirque du Soleil باسپاسٶز قىزمەتٸنەن
سونىمەن قاتار كٶرەرمەندەر بٸرنەشە مەترلٸك الىپ گٷلدەر مەن جەندٸكتەر ەلەمٸن بەينەلەيتٸن ەرەكشە دەكوراتسييالاردى تاماشالاي الادى. بارلىق ساحنالىق قۇرىلىمدار ەر قالادا قايتا قۇراستىرىلىپ, ولاردى ورناتۋعا حالىقارالىق جەنە جەرگٸلٸكتٸ ماماندار قاتىسادى.
OVO شوۋىندا بٸر قويىلىمعا شامامەن 800 كوستيۋم پايدالانىلادى. بارلىق كيٸمدەر مونرەالدا ارنايى تٸگٸلٸپ, ەر ەرتٸسكە جەكە بەيٸمدەلەدٸ.
فوتو: Cirque du Soleil باسپاسٶز قىزمەتٸنەن
كوستيۋمدەردٸ كٷتٸپ-باپتاۋمەن ارنايى ماماندار اينالىسادى, ال تسيرك ٶزٸمەن بٸرگە كٸر جۋعىش جەنە كەپتٸرگٸش ماشينالاردى دا الىپ جٷرەدٸ.
«بٸز ٶزٸمٸزبەن بٸرگە بەس كٸر جۋعىش جەنە ٷش كەپتٸرگٸش ماشينانى الىپ جٷرەمٸز. كەشە ولار بٷگٸنگٸ شوۋعا دايىندالۋ ٷشٸن 60 رەت كٸر جۋدى. ەر قويىلىمنان كەيٸن تاعى 12–15 جٷكتەمە تەك كوستيۋمدەردٸ جۋۋعا كەتەدٸ», – دەيدٸ تسيركتٸڭ رەسمي ٶكٸلٸ.
فوتو: Cirque du Soleil باسپاسٶز قىزمەتٸنەن
شوۋعا ارنالعان مۋزىكانى برازيلييالىق كومپوزيتور بەرنا سەپپاس جازعان. كومپوزيتسييالاردا جەندٸكتەردٸڭ شىنايى دىبىستارى قولدانىلعان. ساحنادا جەتٸ مۋزىكانت پەن ۆوكاليست جاندى داۋىستا ٶنەر كٶرسەتەدٸ, ال مۋزىكا قويىلىم بارىسىنا قاراي ٶزگەرٸپ وتىرادى.
OVO بەلگٸلٸ بٸر ەلگە بەيٸمدەلمەيدٸ. ەرتٸستەر كەيدە سٶيلەگەنٸمەن, ولار كٶرەرمەندەرمەن «جەندٸكتەر تٸلٸندە» تٸلدەسەدٸ.
اكروباتتار ارتۋر دۋدوۆ پەن ەسميرا كۋليەۆا ەرلٸ-زايىپتى. ولار Cirque du Soleil-گە قوسىلعاندارىنا ٷش اي عانا بولعان. دەگەنمەن وسى سالادا ەر تٷرلٸ ۇجىمداردا ٶنەر كٶرسەتٸپ جٷرگەندەرٸنە ۇزاق ۋاقىت بولعان.
فوتو: Cirque du Soleil باسپاسٶز قىزمەتٸنەن
«بٸزدٸڭ نٶمٸردە ٷزٸلٸسسٸز ورىندالاتىن كٶپتەگەن كٷردەلٸ ەلەمەنتتەر مەن اۋىسۋلار بار. مەن بەلدٸككە جالاڭ قولمەن ٶرمەلەپ, تەك ٶز كٷشٸمنٸڭ ارقاسىندا ٸلٸنٸپ تۇرامىن. ەڭ قيىن بٶلٸگٸ – سوڭعى كومبيناتسييا. وندا شپاگاتقا وتىرىپ, تەپە-تەڭدٸكتٸ ساقتاۋىم كەرەك», – دەيدٸ ەسميرا كۋليەۆا.
ونىڭ ايتۋىنشا, Cirque du Soleil قاۋٸپسٸزدٸك مەسەلەسٸنە ەرەكشە مەن بەرەدٸ. سوندىقتان ەرتٸستەردٸڭ كٶتەرٸلۋ بيٸكتٸگٸنە ارنايى شەكتەۋ قويىلعان. ول شامامەن 8–10 مەتردٸ قۇرايدى.
ەرتٸستەر كٷردەلٸ تريۋكتەر ارقىلى كەيٸپكەرلەردٸڭ مٸنەزٸن بارىنشا اشىپ, كٶرەرمەندەردٸ جەندٸكتەردٸڭ تاڭعاجايىپ ەلەمٸنە جەتەلەۋگە تىرىساتىنىن ايتتى.
فوتو: Cirque du Soleil باسپاسٶز قىزمەتٸنەن
«بٸزگە استانا بويىنشا ەكسكۋرسييا ۇيىمداستىردى. قالا ماعان بٸردەن ۇنادى, مۇندا العاش رەت كەلٸپ تۇرمىن. استانا شاعىن دۋباي سيياقتى ەسەر قالدىردى: بەرٸ زاماناۋي ەرٸ تەحنولوگييالىق دامىعان. بٸزدٸ جاساندى ينتەللەكت مۋزەيٸنە اپاردى, تٷرلٸ كٶرمەلەردٸ, تەاترلار مەن وپەرانى كٶرسەتتٸ. باعدارلاما ٶتە مازمۇندى بولدى», – دەدٸ دۋدوۆ.
ەرتٸستەر قويىلىم ٶتەتٸن ارەنانىڭ تەحنيكالىق مٷمكٸندٸكتەرٸن جوعارى باعالاپ, «ەلەمدٸك دەڭگەيدەگٸ ارەنا» دەپ اتادى.
