Jeksenbi, 28 qarashada Chehiiada prezidenttiń eki resmi rezidentsiiasynyń biri Lana saraiynda premer-ministr Petr Fialany taǵaiyndaý rásimi ótti.
Fiala popýlistik ANO partiiasymen respýblikany 8 jyl basqarǵan oligarh Andrei Babishten basyp ozdy.
Zeman Fialany 26 qarashada taǵaiyndaýy tiis bolǵan, biraq koronavirýsqa bailanysty shuǵyl túrde aýrýhanaǵa áketilgen. 77 jastaǵy Zemannyń densaýlyǵy nasharlaǵan.
Chehiia prezidenti saitynyń habarlaýynsha, úkimet jetekshisin taǵaiyndaý rásiminde Konstitýtsiiada jazylǵan tótenshe jaǵdai talaptary men sanitarlyq shekteýlerdiń barlyǵy saqtalǵan.
Múgedekter arbasynda otyrǵan prezidentti zalǵa jinalǵandardan áinek qabyrǵa bólip turdy. Memleket basshysy sol jerde rásimdi qadaǵalap otyrdy.
Sharaǵa qatysýshylar FFP3 sanatyna kiretin respirator taǵyp keldi, al zaldaǵy zattardyń barlyǵy zalalsyzdandyrylyp, jeldetildi.
Liberal-konservativtik kózqarastaǵy Petr Fiala – 57 jasta. 2012 jyldyń mamyry men 2013 jyldyń shilde aralyǵynda Bilim, jastar jáne dene shynyqtyrý ministri boldy. Akademiialyq ortada Brno qalasyndaǵy Masarikov ýniversitetiniń burynǵy rektory jáne prorektory retinde tanymal.
Katolik dinin ustanatyn Fiala shirkeýge jii barady. Ol Chehoslovakiianyń birinshi prezidenti Tomash Masarik kezeńinen beri joǵary laýazymǵa taǵaiyndalǵan alǵashqy ýniversitet oqytýshysy. Úilengen, úsh balasy bar.
