Foto: QazTAG
Bloger Andrei Chebotarevke astanalyq turǵyndarǵa balaǵat sózder aityp, ólim tilegeni úshin 20 AEK (78,64 myń tg) kóleminde aiyppul salyndy, dep habarlaidy Ult.kz QazTAG agenttigine silteme jasap.
"Áleýmettik jelilerdi monitoringteý barysynda politsiia qyzmetkerleri 52 jastaǵy blogerdiń Astana turǵyndaryn qorlap, ólim tilegen jariialymyn anyqtady. Onyń aitýynsha, bul áreketi arqyly ol jol qozǵalysy erejelerin buzatyn júrgizýshilerdiń tártibine degen narazylyǵyn bildirgen. Nátijesinde jariialanym avtory QR ÁQBtK-niń 434-baby boiynsha ákimshilik jaýapkershilikke tartyldy. Sot sheshimimen oǵan 20 AEK mólsherinde aiyppul salyndy", – dep habarlady Astana qalalyq politsiia departamentiniń baspasóz qyzmeti.
Politsiia kópshilikke qarata sóz sóilegende, sonyń ishinde áleýmettik jelilerde etika normalaryn saqtaýǵa shaqyrdy.
Eske sala keteiik, 3 qyrkúiekte politsiia Astana turǵyndaryn qorlaǵan jariialanymǵa qatysty tekseris bastaǵan edi. Onyń avtory qarjy sarapshysy Andrei Chebotarev dep kórsetilgen.
Keiinirek astanalyqtardy balaǵattap, olarǵa ólim tilegen qarjylyq analitik Andrei Chebotarev turǵyndardyń narazylyǵyna jaýap retinde video túsirip, onda ózin "aqparattyq shabýylǵa" ushyraǵanyn málimdedi.
