«Biryńǵai jinaqtaýshy zeinetaqy qory» AQ salymshylardyń jinaq shotyndaǵy qarajattyń «azaiýyna» qatysty pikir bildirdi, dep habarlaidy QazAqparat.
«Sońǵy kúnderi bizge «Jinaqtarymnyń somasy nege azaiyp ketti?» degen saýaldar kóp qoiylady. Máseleniń basyn ashyp alaiyq. Zeinetaqy jinaqtary degenimiz – jarnalar men olarǵa eseptelgen investitsiialyq kiris somasy. Jarnalar eshqashan azaimaidy, olardyń saqtalýyna memleket kepildik beredi», - delingen BJZQ-nyń Instagram-daǵy resmi paraqshasynda.
Atap ótilgendei, jarnanyń 3 túri bar. Birinshisi – mindetti zeinetaqy jarnalary (tabystyń 10%). Ekinshisi – mindetti kásiptik zeinetaqy jarnalary (tabystyń 5%, eńbek jaǵdailary ziiandy óndiristerde jumys isteitin qyzmetkerler úshin jumys berýshi óz qarajaty esebinen tóleidi). Úshinshisi – erikti zeinetaqy jarnalaryn adam óz erkimen tóleidi (ol kez kelgen somada bolady jáne tóleý kezeńin de ózi tańdaidy).
Investitsiialyq kiris – zeinetaqy jinaqtary qarajatyn investitsiialaý nátijesinde alynǵan tabys. Zeinetaqy aktivterin QR Ulttyq banki basqarady.
«Zeinetaqy jinaqtary baǵaly qaǵazdar, sheteldik valiýtalar sekildi ártúrli qarjy quraldaryna investitsiialanady, olardyń quny álemdegi ekonomikalyq jaǵdaiǵa bailanysty únemi ózgerip otyrady. Sondyqtan investitsiialyq kiris ulǵaiýy, azaiýy múmkin. Investitsiialyq tabys kún saiyn esepteletin bolǵandyqtan, zeinetaqy jinaqtarynyń jalpy somasy da ózgerip otyrady. Sondyqtan investitsiialyq kiris tómen bolǵan kezde, zeinetaqy jinaqtarynyń somasy azaiady, investitsiialyq tabys jaqsy bolsa – zeinetaqy jinaǵy da ulǵaiatyn bolady», - dedi zeinetaqy qorynan.
Bul jerde investitsiialaý tabystylyǵyn birneshe kún siiaqty az ýaqyt emes, bir jyl tárizdi uzaǵyraq ýaqyt úshin qaraý kerek. Jyl basynan bergi investitsiialyq qyzmet nátijeleri oń úrdisti kórsetip otyr - salymshylardyń shottaryna 661,7 mlrd teńgeden astam investitsiialyq tabys eseptelgen. Al bul - jyl basyndaǵy kórsetkishten 6% -ǵa jáne sońǵy 12 aidaǵy tabystan 12%-ǵa jýyq mólsherge artyq.
«Qurmetti salymshylar! «Qazaqstan Respýblikasynda zeinetaqymen qamsyzdandyrý týraly» QR zańyna sai sizderdiń jinaqtaryńyz tek sizderdiń menshikterińiz bolyp esepteledi», - dep málimdedi Biryńǵai jinaqtaýshy zeinetaqy qorynan.
