BJZQ-daǵy jymqyrý isi boiynsha tórt figýrant eki aiǵa qamaýǵa alyndy, - dep habarlaidy "Ult aqparat" kaz.tengrinews.kz portalyna silteme jasap.
Almaty qalalyq Almaly aýdandyq soty "BJZQ" AQ basqarma tóraǵasy Rýslan Erdenaevqa, "BJZQ" AQ qaterlerdi basqarý departamentiniń qarjy qaterleri basqarmasynyń basshysy Musa Bahtovqa, "AlataýMunaiAltyn" baqylaý keńesiniń tóraǵasy, sondai-aq, "Býzgýl Aýrým" JShS quryltaishysy Baqytjan Kenjebaevqa, "Býzgýl Aýrým" JShS Azat Naizaǵarinaǵa qatysty qamaýǵa alý túrindegi bultartpaý sharasyn tańdaý týraly qaýly shyǵardy", - dep habarlady Almaty qalalyq sotynyń aqparatpen qamtý bóliminiń basshysy Dias Mahambetov.
Mahambetovtyń málimetinshe, sotqa deiingi tergeý organdary Rýslan Erdenaevqa jáne ózge kúdiktilerge múlikke qarsy aýyr qylmys jasady degen kúdik keltirip otyr. Olarǵa QR Qylmystyq kodeksiniń 189-babynyń 4-bóliginiń 2-tarmaqshasy boiynsha aiyp taǵyldy - "Senip tapsyrylǵan bóten múlikti iemdenip alý nemese talan-tarajǵa salý".
"Sottyń qaýlysymen kúdiktilerge qatysty eki ai merzimge qamaýǵa alý túrindegi bultartpaý sharasy tańdaldy", - dedi Dias Mahambetov.
Tórt figýrant sottyń qaýlysyna shaǵym túsirdi.
Ashyq derekkózderge súiensek, Rýslan Erdenaevtyń eki orynbasary bolǵan - Sáýle Dúisenova men Dabyr Medetbekov. Biraq ázirshe qaisysy qamaýǵa alynǵany belgisiz.
Aita keteiik, Ulttyq bank ókili Aleksandr Terentev 6 qańtardaǵy baspasóz máslihatynda BJZQ-ǵa qatysty qylmystyq istiń Ulttyq banktiń ótinishinen keiin qozǵalǵanyn málimdegen.
Eske salaiyq, 2016 jyldyń 21 jeltoqsanynan bastap QR Ulttyq bankiniń qatysýymen "Biryńǵai jinaqtaýshy zeinetaqy qory" Aktsionerlik qoǵamynyń qyzmetine tekseris júrgizilgen bolatyn. Sol kezde tekseristiń BJZQ aktsionerlik qoǵamynyń menshikti aktivterdi investitsiialaýǵa qatysty jasalǵan operatsiialary boiynsha júzege asyrylyp jatqany aitylǵan edi. "BJZQ" AQ-tyń menshikti aktivteri onyń kapitaly jáne sharýashylyq qyzmetiniń nátijeleri esebinen qalyptastyrylady eken. "BJZQ" AQ menshikti aktivterdi derbes basqarady", - degen edi banktegiler.
"Azamattardyń zeinetaqy jinaqtary "BJZQ" AQ-tyń balansynan bólingen jáne bólek eskeriledi. Ulttyq Bank zeinetaqy jinaqtaryn investitsiialaýdy Qazaqstan Respýblikasynyń Ulttyq qoryn basqarý jónindegi keńes maquldaǵan 2016 jylǵa arnalǵan baǵyttar boiynsha ǵana júzege asyrady. Bul rette 2016 jyly zeinetaqy aktivterin ekonomikanyń naqty sektorynyń jeke kompaniialarynyń qarjy quraldaryna investitsiialaý kózdelmeidi" delingen edi UB habarlamasynda.
