BJZQ aldyndaǵy boryshyn ótemegen qazaqstandyq azamat Londondaǵy úiinen aiyrylýy múmkin, dep habarlaidy QazAqparat tilshisi.
«Esterińizde bolsa, bul Emitent («Qazaqstan qaǵazy») Londonda burynǵy aktsionerlerine qarsy sotta jeńip shyqqan bolatyn. Berilgen soma 315 mln AQSh dollaryn qurady. Emitent negizgi jaýap berýshi - Maqsat Áriptiń buǵattalǵan 112 mln AQSh dollarynan bólek Londonda quny 25 mln dollar bolatyn 6 nysandy tapty. Bul jyljymaityn múliktiń iesi kiprlik kompaniia bolyp shyqty. Múlik senimdi basqarýǵa berilgen», - dedi BJZQ zań departamentiniń direktory Nazym Baqtybaev.
Senimdi basqarýshynyń iesi Maqsat Áriptiń áieliniń anasy bolyp shyqty. Sońǵy sot otyrysy 2018 jyldyń 31 tamyzynda ótedi. Onda atalǵan múliktiń Maqsat Áripke tiesili nemese emestigi sheshiletin bolady.
Munyń aldynda BJZQ ókilderi boryshker emitentteri týraly habarlaǵan bolatyn.
2017 jyldyń jeltoqsanynda «Qazaqstan qaǵazy» AQ emitenti boiynsha ońaltý sharalary toqtatylyp, bankrottyq protsedýrasy jasalǵan. Bul sharamen kelispegen Qor basshylyǵy QR Joǵarǵy sotyna aryz túsirgen bolatyn. Biyl shildede Joǵarǵy sot munyń aldynda shyqqan sot aktilerin qaita qaraý týraly qaýly shyǵardy. Endi bul másele QR Joǵarǵy sotynyń azamattyq kollegiiasynda 22 tamyzda qaralatyn bolady.
