Eki million qazaqstandyqtyń zeinetaqy jinaǵyna qarajat turaqty aýdarylmaidy, dep málimdedi "BJZQ" AQ basqarma basshysy Nurbibi Naýryzbaeva baspasóz máslihaty kezinde.
"Memleket basshysy ózin-ózi jumyspen qamtýshylar máselesine nazar aýdarýdy tapsyrǵanyn bilesizder. Búgingi tańda eki millionǵa jýyq shotqa qarajat turaqty túspeidi. Bizdiń paiymdaýymyzsha, bular ózin-ózi jumyspen qamtýshylar nemese jumyssyzdar", — dep málimdedi ol. Basqarma basshysy túsindirip ótkendei, zeinetaqy qory ózin-ózi jumyspen qamtýshy azamattarmen aýqymdy jumysty bastap ketken.
"Biyl ózin-ózi jumyspen qamtýshy halyqpen jumys isteýdi bastadyq… Alǵashqy jarty jylda 375 myń adamdy qamtimyz dep josparlap otyrmyz. Derekter bazasynan shotynda qarajat joq nemese ýaqytyly salym salynbaityn kelisimderdi tańdap aldyq. Menedjerlerimiz bul azamattarmen habarlasyp, qarajat aýdarmaý sebepterin suraidy, jumyssyz bolǵan jaǵdaida áleýmettik baǵdarlamalar jaiynda maǵlumat beredi, shaǵyn jáne orta biznesti túsindiredi", — deidi Naýryzbaeva.
Onyń sózine súiensek, eki ai ishinde 71 myń azamatpen bailanys ornatylǵan.
