2019 jyldyń 1 sáýirindegi jaǵdai boiynsha zeinetaqy jinaqtarynyń jalpy somasy 9,64 trln teńgeni qurap, jyl basynan beri 262,3 mlrd teńgege ósti. Bul týraly BJZQ baspasóz qyzmeti habarlady.
Qordyń málimetinshe, mindetti zeinetaqy jarnalary (MZJ) boiynsha jinaqtar somasy 9,43 trln teńgeni quraǵan. Mindetti kásiptik zeinetaqy jarnalary (MKZJ) boiynsha jinaqtar somasy 209,5 mlrd teńgeni jáne erikti zeinetaqy jarnalary boiynsha (EZJ) jinaqtar somasy 1,9 mlrd teńge bolǵan.
Sonymen qatar, sharttardyń barlyq túrleri boiynsha jeke zeinetaqy shottarynyń jalpy sany 10,4 mln birlikten asqan.
«2019 jyldyń alǵashqy úsh aiy ishinde zeinetaqy tólemderi 54,4 mlrd teńgeni qurady. Onyń ishinde jasyna bailanysty tólemder 31,6 mlrd teńgeni, al saqtandyrý uiymdaryna jasalǵan aýdarymdar 7,4 mlrd teńge boldy. Jyl basynan beri Qor salymshylarynyń shottaryna eseptelgen taza investitsiialyq tabys somasy 96,9 mlrd teńgege jetti. Bul kórsetkish 2018 jyldyń sáikes kezeńinde alynǵan taza investitsiialyq tabystan 30 mlrd teńgege artyq», - delingen habarlamada.
Zeinetaqy jinaqtarynyń tabystylyǵy sońǵy 12 ai ishinde (2018 jyldyń sáýiri – 2019 jyldyń naýryzy) 11,5 paiyzdy quraǵan. Bul kezeńde infliatsiia deńgeii 4,8 paiyzdy kórsetken. Osylaisha zeinetaqy aktivteriniń naqty tabystylyǵy infliatsiiadan 6,7 paiyzǵa joǵary bolyp otyr.
«Qor klientterge qyzmet kórsetý jumystaryn únemi jetildirip keledi. Jyl basynan beri salymshylar men alýshylarǵa 6,2 millionnan astam qyzmet kórsetildi. Bul rette qyzmet kórsetýdiń elektrondyq tásili basymdyqqa ie – elektrondyq formatta (zeinetaqy shotynan beriletin úzindi kóshirmeni esepke alǵanda) 5,3 millionnan astam (nemese 85,6%) operatsiia júzege asyryldy», - delingen habarlamada.
«BJZQ» AQ turǵyndar arasynda belsendi túrde aqparat berý-túsindirý jumystaryn júrgizýde. Bul rette kásiporyndar men uiymdarda jáne saýda oryndarynda kóshpeli tanystyrylymdyq sharalar ótkiziledi. Jyl basynan beri 6,8 myńnan astam tanystyrylym ótkizilip, olarǵa 211 myńnan astam adam qatysqan.
