Biýdjettiń árbir teńgesi óz maqsatyna jumsalýy tiis. Bul týraly Prezident Qasym-Jomart Toqaev Twitter-paraqshasynda jazdy, dep habarlaidy "Ult aqparat".
«Prokýratýra karantin jaǵdaiynda zańdylyqtyń saqtalýyna, áleýmettik jáne daǵdarysqa qarsy baǵdarlamalarǵa bólingen qarjynyń jumsalýyn baqylaýǵa erekshe mán berýi qajet. Biýdjettiń árbir teńgesi óz maqsatyna jumsalýy tiis», - dedi Memleket basshysy.
Eske salaiyq, búgin Qazaqstan Prezidenti QR Bas prokýratýrasynyń basshylyq quramymen keńes ótkizdi. Memleket basshysy karantin kezinde politsiia men sanitarlyq qyzmet tarapynan olqylyqtar jiberiletin bolsa, ondai jaǵdaida prokýratýraǵa birden qajetti sharalar qabyldaýdy tapsyrdy.
«Qazirgi kezeńde biz ekonomikadaǵy jaǵymsyz úderisterdi joiýǵa kúsh salyp jatyrmyz. Osyǵan bailanysty keide Ulttyq qordyń qarjysyn jumsaýǵa týra keledi. Sondyqtan bul qarajattyń zańdy jáne oryndy igerilýi airyqsha mańyzdy. Ásirese, memlekettik áleýmettik baǵdarlamalar men daǵdarysqa qarsy sharalarǵa bólingen qarjyǵa erekshe nazar aýdarý kerek. Sondai-aq jalaqy, zeinetaqy jáne járdemaqy tóleý máselelerin árdaiym baqylaýda ustaý qajet. Biýdjetten bólingen ár teńge maqsatqa sai jumsalyp, qoǵamǵa paida ákelýge tiis, – degen bolatyn Prezident.
