Elimizdiń biýdjetinen qarjy jymqyryp, Resei asqan eki azamat elge qaitaryldy. Bul týraly QR Qarjy ministrligi Memlekettik kirister komitetiniń baspasóz qyzmeti habarlady.
«Qazaqstan Respýblikasy Qarjy ministrliginiń Memlekettik kirister komiteti 2018 jyldyń naýryz aiynda Resei federatsiiasynan Qazaqstan Respýblikasyna, Komitettiń ekonomikalyq tergeý qyzmetimen izdeýde júrgen 2 Qazaqstan azamatyn elge qaitardy. Olar Batys Qazaqstan oblysy boiynsha azyq-túlik turaqtandyrý qoryn aimaqtyq qalyptastyrý jáne Atyraý qalasynyń oń jaǵalaýyndaǵy sý tazartý qurylystaryn salý baǵdarlamalary sheńberinde bólingen biýdjet qarajattaryn jymqyryp, keiin Resei aýmaǵynda jasyrynǵan», - delingen habarlamada.
2017 jyly Reseidiń quqyq qorǵaý organdarynyń qyzmetkerlerimen birlesken jedel-izdestirý is-sharalar nátijesinde qylmyskerler ustalyp, qamaýǵa alyndy.
«Bul adamdardyń áreketteriniń saldarynan memleketke keltirilgen ziian shamamen 322 mln. teńgeni qurady», - delingen komitet taratqan aqparattarda.
